Oktâbrniñ 28-nde gece Herson merkezine yapılğan ücüm neticesinde eki kişi elâk oldı. Bu aqta vilâyetniñ arbiy memuriyet yolbaşçısı Oleksandr Prokudin bildirdi.
Onıñ aytqanına köre, Rusiye arbiyleriniñ ücümine şeerniñ Merkeziy rayonındaki çoq qatlı evler oğradı. Eki kişi ve bir bala yaralandı.
Bir kün evelsi akimiyet Hersonda bir qaç ateş açuv neticesinde beş adamnıñ ölümi aqqında haber etti. Şeer asılında cebe safında – Dnipronıñ diger yalısını Rusiye ordusı işğal ete.
Oktâbrniñ 28-ne keçer gecesi Rusiye arbiyleri Harkivge bir sıra ücüm yaptı, şeerniñ dört rayonına bir kereden ücüm ettiler. 10-dan ziyade adam yaralandı.
Şeerniñ Holodnogorsk rayonında doquz qatlı binanıñ yanında snarâd tüşip, yuqarı qatlarnıñ divarlarına ve pencerelerge zarar ketirdi, yanğın başlandı. Bu aqta Harkiv vilâyetiniñ arbiy memuriyetiniñ yolbaşçısı Oleg Sinegubov bildirdi. Harkiv şeeriniñ yolbaşçısı İgor Terehovnıñ aytqanına köre, şeerniñ gece toplanuvı neticesinde yedi adam yaralandı, olarnıñ arasında 16 yaşında qız da bar edi. Onıñ aytqanına köre, sekizinci ve doquzıncı qatlar arasındaki tavan zarar kördi, üç daire yıqılğan.
Oktâbrniñ 27-nde aqşam Rusiye ordusı idare etilgen bombalarnen bir kereden Harkivniñ üç rayonına ücüm etti – Şevçenkovskiy, Kiyev ve Saltovskiy. Esas darbe hususiy sektorğa tüşti, 21 ev ve bir qaç maşinağa zarar keldi. Bu ücümde eñ az altı adam yaralanğan, dep haber ete yerli akimiyet.
Soñki ayları Rusiye arbiyleri cebeden biraz uzaqta yerleşken Ukrayina şeerleri, meselâ, Harkiv ya da Zaporijjâğa ücüm etmek içün idare etilgen bombalarnı çoqça qullanalar. Böyle ücümler neticesinde mesken binalar ve vatandaş infrastrukturası bir qaç kere zarar kördi, ölüm ve yaralanuvlar oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.