Harkivde açılğan ateş neticesinde ağır yaralanğan 15 arbiy ve 16 vatandaş hastahanege ketirildi, dep bildirdi fevralniñ 28-nde şeer şurası saytında.
«Bir qadın (vatandaş) öldi. Ateş endi toqtatılğanı içün yaralanğanlarnıñ sayısı deñişe bile, elâk olğanlarnıñ sayısı soñra haber etilecek», – dep aytıla haberde.
Şeer yolbaşçılığınıñ malümatına köre, umumen keçken künü Harkiv acele tibbiy yardım şeer klinik hastahanesine ve №25 şeer klinik hastahanesine 44 yaralanğan kişi ketirildi, 20-si arbiy ola. Eki arbiy ve beş vatandaş vefat ettiler.
Bugün Ukraina İç işler naziriniñ mesleatçısı Anton Ğeraşçenko bildirgenine köre, Harkiv Rusiye orduları tarafından «Grad» sistemalarınıñ ateşine oğradı.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Prezident Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net