ABD ve AB terroristik dep tanığan «Hamas» İsmail Haniyeniñ ölüminden soñ yañı siyasiy lideriniñ adını ilân etti. Bu vazifege Yahya Sinvar saylandı, onı 2023 senesi oktâbrniñ 7-nde İsrailge qarşı ücümniñ teşkilâtçısı dep adlandıralar.
Agentlikniñ malümatına köre, Yahya Sinvar Gazzede saqlana. Çağına yetken soñ ayatınıñ yarısını İsrail apishanelerinde keçirgen Sinvar Haniye öldürilgen soñ «Hamasnıñ» eñ itibarlı lideri ola.
İsmail Haniye iyulniñ soñunda Tehranda darbe neticesinde elâk oldı. İsrail akimiyeti ölüminden mesüliyetli olğanını tanımadı.
İyulniñ soñundan berli regiondaki vaziyet pek kerginleşe, İran ve qoltutqan «Hizbullah» kibi gruppirovkalar liderleri öldürilgeni içün İsrailden «sert bir intiqam» azırlana, dep bildireler. Laf Beyrutta «Hizbullah» komandanı Fuad Şukr ve «Hamasnıñ» siyasiy lideri İsmail Haniye aqqında kete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.