Halqara Qırım platformasınıñ beşinci sammiti ilk küz ayınıñ 24-nde Nyu-Yorktaki (ABD) BMT ştab-kvartirasında keçirilecek. Bu aqta Tış işler naziri Andriy Sıbiğa bildirdi.
"Sammit, Rusiyeniñ tecavuzı ve Ukrayina toprağını ilhaq etme ıntıluvı şaraitinde Birleşken Milletler Teşkilâtı Baş Assambleyasınıñ Nizamnamesine riayet etüv boyunca qattı mevamını tasdıqlaycaq. 2014 senesinden başlap, Assambleya Qırım Ukrayina qısmı olğanını tasdıqlağan yigirmiden ziyade qararnı qabul etti", — dep qayd etti o.
Ukrayina bütün barışıqsever BMT aza devletlerini sammitke qoşulmağa, BMT Nizamnamesini qorçalamağa ve Ukrayinada adaletli ve devamlı barışıq qurulmasına yardım etmege davet ete, dep qayd etti nazir.
Evel Ukrayina prezidenti Volodımır Zelenskıy, Rusiye Federatsiyasınıñ sammitniñ keçirilmesine keder etme ıntıluvlarına diqqat ayırdı ve olarnı "Moskvanıñ Qırımnı işğalden qurtaruv meselesine halqara diqqatını toqtatmaq içün sistemli siyaseti" dep adlandırdı.
Qırımnı işğalden azat etüv halqara meydanı ("Qırım platforması") — Ukrayina akimiyetiniñ Qırım sakinleriniñ aqlarını qorçalav ve işğal etilgen yarımadanı işğalden qurtaruv boyunca Ukrayina ve halqara ortaqlarnıñ areketlerini koordinatsiya etmek içün muzakere platformasını meydanğa ketirüv teşebbüsi.