Orta küz ayınıñ 6-nda Ukrayina Tış işler nazirliginiñ yardımınen Ukrayina İnstitutı tarafından teşkil etilgen Halqara medeniy diplomatiya forumı çerçivesinde dünyada ukrayin ve qırımtatar tilleriniñ populârlaştırılması içün "Хвиля / Dalğa" mukâfatınıñ tesis etilmesi ve ilk berilmesi olıp keçti, mukâfat içün 18 memleketten 44 namzet yarıştı, dep haber ete halqara "Qırım platforması" saytı.
Berilgen malümatqa köre, mukâfatnıñ birinci laureatları — Londra universitet kolleciniñ ukrayin tili ocası Marta Enkala ve İstanbul universitetiniñ qırımtatar tili ocası Narıye Seydametova oldılar
Marta Yenkala
Ukrayina Tış işler naziri Andriy Sıbiğa, Ukrayina İnstitutınıñ müdir muavini Alim Aliyev, Qırımtatar Milliy Meclisiniñ reisi Refat Çubarov ve mukâfat jüri reisi, "Lviv politehnikası" Milliy universitetiniñ Halqara tasil, medeniyet ve diaspora ile alâqalar institutınıñ müdiri İrına Klüçkovskaya çıqışta bulundılar.
Bu mukâfatnıñ qırımtatar tiline qol tutuv kerekliginiñ tanılması kontekstinde teşkil etilmesiniñ müimligini qayd etip, Andriy Sıbiğa dedi: "Bugünki kerçeklerde ukraнin ve qırımtatar medeniyetiniñ pekitilmesi — tamırlarımız ve kimligimizniñ pekitilmesidir, til ise — bu kimlikniñ temel elementidir".
Andriy Sıbiğa
Refat Çubarovnıñ qayd etkenine köre, Qırım işğaliniñ menfiy neticelerinden biri şunda ki, Rusiye ana tilini ögrenmek imkânını bütünley qapattı. Meclis reisi qırımtatar tiliniñ ğayrıdan tiklenilüvi ve inkişafında ukrayin devletiniñ rolüni qayd etti: "Ukrayin devlet tiliniñ inkişafı ve qullanıluvı, Ukrayina tamır halqlarınıñ tilleriniñ inkişafı meselesi — bu, kerçekten de, yapqanımıznıñ qorçalavına doğrultılğan areketlerdir. Bu qalqanımızdır, ve onı qayğırağanımız qadar, yaşaycaqmız".