Moskovada Qızıl meydanda iyül 10-unde quvetçiler qırımtatar milliy areketiniñ yedi faalini tutıp aldı. Olarnıñ episi miting keçirilmesiniñ muayyen etilgen qaideleriniñ bozmasında qabaatlaylar (Rusiye Memuriy uquq bozuvları Kodeksiniñ 20.2 maddesi). Memuriy uquq bozuvı aqqında protokol tizilgeninden soñ, olarnı yiberdiler.
İyül 10-unde, çarşenbe künü, Rusiye paytahtında qırımtatar milliy areketiniñ veteranları kütleviy piket keçirdi. Piket iştirakçilerniñ plakatlarında, hususan: "Qırımda milliy ve diniy alâmetke köre basqını toqtatıñız", "Qırımda "terrorcılıq"nen küreş - bu başqa fikirde olğanlarnıñ taqibidir", "Balalarımız terrorcı degil" ve il., dep yazılğan edi. Yetip adamnı tutıp aldılar ve polis bölügine alıp kettiler.
Qırımtatar milliy areketiniñ veteranlarınıñ Moskovada piketi, iyül 10, 2019
Qırım.Aqiqat mühbirine Rusiye uquq qoruyıcısı Aleksandra Krılenkova haber etkeni kibi, piketten soñ yedi adamnı tutıp aldılar.
Piket birinci Bağçasay "Hizb ut-Tahrir davası"nıñ apellâtsiyasına bağışlanğanAleksandra Krılenkova
"Doğru saat 11:00 Qızıl meydanda Lenin mavzoleyiniñ qarşısına, menimce, onlarnen qırımtatar milliy areketiniñ veteranı çıqıp, plakatlarnı açtı. Olarnıñ piketi birinci Bağçasay "Hizb ut-Tahrir davası"nıñ apellâtsiyasına bağışlanğan. Beş daqqadan soñ polisniñ eki yengil maşnası kelip, er keske: cıyılıñız, dep ayttı. Soñunda piketniñ üç iştirakçisini bir maşnağa oturttılar, daa üçüni - başqa maşnağa, ve daa birisini - bir yerge alıp kettiler", - dep aytıp berdi Krılenkova.
Rusiye uquq qorçalayıcısı aytqanına köre, Fevzi Abduramanov, Eskender Lümanov, Sinaver Nimetullayev, Reşat Emirüseinov, Siyar Gafarov, Enver Seytumerov ve Seyran Cemilev tutuldı. Olarnıñ episini Moskovanıñ "Kitay-gorod" polis bölügine alıp kettiler.
Qırım.Aqiqat mühbirine Sinaver Nimetullayev haber etkenine köe, yedi qırımtatar faali miting keçirüv tertibini bozğanında (Rusiye Memuriy cinayetler kodeksiniñ 20.2 maddesi) qabaatlandı.
Onıñ aytqanına köre, polis hadimleri, faaller mahkeme oturışına kelir, dep, olarğa söz berdirtti.
«Er birine qarşı 20.2 maddesine istinaden memuriy protokollar tizildi. Üç saattan soñ yiberecekler. Tezden (politsiya bölüginden – QA) çıqarmız, dep tüşünem. Mahkemege kelmege mecbur ettiler. Advokat keldi, protokollarnıñ fotosını çıqara. Mümkün olğanı qadar nezaketli laf ettiler», – dep ayttı Nimetullayev.
Qırım.Aqiqatqa advokat Aleksandr Pihovkin tarif etkeni kibi, Qızıl meydandaki narazılıq aktsiyasında iştirak etken yedi qırımtatar faali Moskvanıñ «Kitay-gorod» politsiya bölüginden yiberildi.
Mahkeme tecribesine baqılğanda, mezkür madde boyunca insanlar 10 biñ rubleden başlap para cezalarını alaAleksandr Pihovkin
«Olarnı Memuriy cinayetler kodeksiniñ 20.2 maddesiniñ 5-inci maddesine – toplaşuv, miting, numayış, yürüş ya da narazılıq aktsiyasını keçirüv tertibiniñ açıq bozuluvı – istinaden qabaatlaylar. Mahkeme tecribesine baqılğanda, mezkür madde boyunca insanlar 10 biñ rubleden başlap para cezalarını ala», – dedi o.
Advokatnıñ aytqanına köre, politsiya hadimleri «tutulğanlar izzetli yaşında olğanı içün» özüni nezaketli alıp bardı.
Amma o, memuriy protokollar «hatalarnen tizilgenini» qayd etti.
Üç esas qaide bozuldı: memuriy tahqiqatta ana tilinde iştirak etüv, terciman aqqı ve imayeci aqqıAleksandr Pihovkin
«Üç esas qaide bozuldı: memuriy tahqiqatta ana tilinde iştirak etüv, terciman aqqı ve imayeci aqqı. Vesiqalarda cinayet tafsilâtlıca añlatılmay, tek olğanı qayd etile», – dep qoştı advokat.
Onıñ bildirgenine köre, yedi faalniñ mahkeme oturışuvları Moskvanıñ Tver rayon mahkemesinde keçirilecek.
İyülniñ 10-nda Moskvanıñ Qızıl meydanında qırımtatar milliy areketi iştirakçileriniñ tutuluvını Qırımtatar Milliy Meclisiniñ reisi, Ukraina halq deputatı Refat Çubarov tefsir etti.
Halq boysunmadı, halq namusını saqlay, halq küreşke azırRefat Çubarov
«Soñki sefer 1987 senesi qırımtatarlar Qızıl meydanğa çıqıp, öz toprağına qaytmalarını talap etti, insanlar Sovetler birliginiñ çeşit köşelerinden kelgen edi… 32 yıldan soñ qırımtatarlar kene Qızıl meydanda. Halq boysunmadı, halq namusını saqlay, halq küreşke azır», – dedi Çubarov Facebook saifesinde derc etilgen video muracaatında.
O, iyül 10-unda piketke çıqqanlarğa minnetdarlığını bildirdi.
«Qırımtatar Milliy Meclisi adından Qızıl meydanda ukrain halqınıñ serbestligini, siyasiy mabüslerniñ azatlığını, vaqtınca işğal etilgen Qırımda repressiyalarnıñ toqtatıluvını talap etken cesür qırımtatarlarğa teşekkürler bildirem», – dep qayd etti Çubarov.
Refat Çubarov
Qırım.Aqiqat Moskvadaki «Kitay-gorod» politsiya bölüginiñ hadimi ile bağlandı, lâkin o, tutulğan faallerniñ bulunğan yeri aqqında suallerge cevap bermeyip, Moskvanıñ Merkeziy okrug iç işler idaresiniñ matbuat hızmeti ile bağlanmağa tevsiye etti. Anda ise mühbirniñ telefon etkenine cevap bermeyler.