Gürcistanda koronavirus qırğınlığı sebebinden başlatılğan sıñırlav tedbirleri quvetleştirildi: aprelniñ 17-nden itibaren memlekette maşina ve diger şahsiy naqliyat qullanıluvı yasaqlana. Bu aqta Azatlıq Radiosı haber ete.
Yasaq aprelniñ 21-ne qadar devam etecek, dep bildirdi ükümet vekili İrakliy Çikovani.
Sıñırlavlar yük naqliyat vastaları ve taşıma maşinalarına tesir etmey.
Çikovani, yañı tedbirler «virus tarqaluvınıñ faal stadiyasını» yımşatmaq içün ilân etile, dep bildire.
O, yaqın aftalarda COVID-19 hastalarınıñ sayısı artacaq, dep tahmin etti ve ükümetniñ evde qalmaq çağıruvlarını tekrarladı.
Bundan ğayrı, aprelniñ 17-nden başlap Gürcistanda daa eki sıñırlav olacaq: cemaat binalarında er kes maska taqmalı, mezarlıqlar qapatıla.
Ükümet vekili, Gürcistan vatandaşları sıñırlavlarğa riayet etmese, akimiyet «tam karantinge» keçe bile, dep tenbiledi.
Johns Hopkins Universitetiniñ malümatına köre, Gürcistanda 348 insan koronavirusqa oğradı, üç kişi vefat etti.
Memlekette mayısnıñ 10-na qadar fevqulâde vaziyet olacaq. Saat 21:00-dan 6:00-ğa qadar komendant saatları ola. Tek azıq tükânları ve aphaneler açıq qala, qalğan tükânlar, restoran, qave ve yaqıt stanktsiyaları çalışmay.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.