Çeşmeler çalışmay, qurucılıq kete. Gurzuf nasıl deñişe (fotoresimler)

Gurzufnıñ tarihiy merkezi. Eski zamanlarda mında çeçek bazarı bar edi, etrafında ise qırımtatarlarnıñ özgün evleri tura edi. Bugünde-bugün Gurzufnıñ qalbinde qave, aşhane ve tükânlar tura. Qurucılıq işleri mında işğalden evel başladı ve bugün devam ete

Eskiden Gurzufta bir sıra çeşme bar edi, Qırımğa kelip ketken şair ve ressamlar olarnı qayd etken edi. Bugünki künümizge ancaq 3 çeşme keldi. İç birisi çalışmay

Ticaret noqtasınıñ arqasında saqlanğan çeşme Aleksandr Puşkinni ayrette qaldırğan edi. Yadikârlıqnı tamir etip çalıştırmaq işi aqqında laf da yoq

Yalı boyunda çalışmağan çeşme. 12 yıldan berli çalışmay, onı ne tamir eteler, ne alıp taşlaylar

Lâkin Gurzuftaki tarihiy binalarnı yıqalar. Bu qurucılıq 100 yıldan berli turğan ev yerinde kete. Mında turistler raatlanacaq

Daa bir ticaret yeri Çehov soqağında qurula. Cemaatçılar qurucınıñ izin vesiqaları yoq, dep israr ete. Qurucılıq yerlerinde obyektlerniñ pasportları da yoq

Çehov soqağındaki qurucılıq yerinden Qara deñiz manzarası açıla

Bu yerde de qurucılıq başlağan edi. İşçiler qaleniñ bir qısmını yoq etti. Amma cemaatçılar ses-şamata kötergen soñ işler toqtatıldı

Cemaat faalleri «musulman kemiklerinde» qurucılıqnı toqtatıp olamadı. Yerli sakinler ne qadar açuvlansa da, «Artek» lageriniñ yañı binası eski mezarlıq yerinde qurula

Eskiden bu ev yerinde qırımtatar mektebi bar edi

Bu divar – Qırımda eñ dülber tanılğan camilerden birinden qalğan yekâne şey. Cami 1927 senesi olğan küçlü yer teprenüvine dayandı, lâkin sovetler tarafından viran etildi

Gurzufnıñ eñ uzun soqağı – Leningrad. Onıñ uzunlığı 5 kilometrden çoq. Yerlilerniñ aytqanına köre, kurort mevsimi vaqtında mında ses ve insanlar çoq, dekabr ayında ise soqaq sessiz qala

Gurzuf ket-kete topraq, park, bağça ve eski evlerinden marum qala. Amma qasabanıñ diger timsali – mışıqlar – ep qala