Türkiye Mudafaa nazirligi Türkiye uçağınıñ qazası aqqında bildirdi: “Azerbaycandan memleketimizge uçqan C130 Gürcistan-Azerbaycan sıñırında tüşti. Azerbaycan ve Gürcistan akimiyetlerinen işbirliginde qıdıruv-qurtaruv işleri başlatıldı”, dep aytıla müessise haberinde.
Gürcistan ve Azerbaycan qaza olğanını tasdıqladı. Gürcistan İç işler nazirligi bildirgenine köre, Türkiye Silâlı quvetleriniñ. C-130 arbiy-naqliyat uçağı Gürcistanda, Azerbaycandan 5 km uzaqlıqta Signagide tüşti. Azerbaycan uçaq Gâncadan uçtı, dep haber etti.
İçtimaiy ağlarda uçaq qazasınıñ videoları tarqatıla, ne qadar doğru olğanı şimdilik tasdıqlanmay:
Azerbaycan prezidenti İlham Aliyev öz saytında Türkiye prezidentine taziyeler bildirdi. “Türkiye Arbiy silâlı quvetleriniñ arbiy-naqliyat uçağınıñ tüşmesi neticesinde arbiylerniñ ölüm haberinen sarsıldıq. Qardaş Türkiye halqına facia sebebinen eñ teren taziyelerimni bildirem”, dep aytıla mektüpte.
Türkiye Milliy mudafaa nazirligi uçaqta bulunğanlarnıñ sayısını şimdilik aydınlatmay.
Lockheed C-130 Hercules – dört burumğa vintli köçüricisi olğan arbiy-naqliyat uçağı, Lockheed Martin Amerika şirketi tarafından yapıla. Uçaq topraq ya da qısmen asfaltlı uçuş şeritlerinden uçıp qona bile ve arbiy yük, arbiyler taşıy ve tahliye içün qullanıla bile.
Türkiye Silâlı quvetleriniñ bu çeşit arbiy uçaqlarından 20 danesi bar.