Belorusiye muhalefetiniñ lideri Svetlana Tihanovskaya Qırım ve Donbas Ukrainanıñ olğanı körünip tura, dep saya.
"Ukraina... Er şey körünip tura. Daa yaqınlarda, eñ başında, "de-yüre", "de-fakto" ibareleri aytıla edi. Amma şimdi memleketimizde prezident yutquzğanını, amma asılında iqtidar onda qalğanını añlağanımızda, vaziyet biraz ziyade aşkâr oldı, ğaliba. Gizleme içün artıq ihtiyac yoq", – dedi Tihanovskaya “Gordon”ğa intervyü vaqtında.
Tihanovskaya, Rusiyeniñ Ukrainağa qarşı nasıl cinayet etkenini añlaymı, yoqmı sualge, “qabaatlı olğan er kes cezalanamaq kerek”, dep qayd etti.
"Rusiye cinayet etmedi, cinayetni adamlar etti. Bu cinayetni yapqan olsalar tahqiqat ve mahkeme olmalı. Bir de bir qabaatlavlar çıqarıp olamaymız. Rusiyeliler ve ukrainler arasında munasebetlerni bozıp, Rusiye büyük bir hata yaptı, dep tüşünem", – dedi Tihanovskaya.
2020 senesi Azatlıq Radiosına eksklüziv intervyü vaqtında Tihanovskaya Qırım halqara qanunğa köre Ukrainağa mensüp, dep ayttı. Amma, de-fakto Qırım kimniñki sualge böyle: “ne bar, o bar”.
Your browser doesn’t support HTML5
Знают ли белорусы – чей Крым?
Belorusiyede prezident kampaniyasınıñ eñ qızğın vaqtında, Tihanovskaya Qırım “asılında Rusiyeniñki” dedi.
Ukraina TİN başı Dmıtro Kuleba Tihanovskayanıñ Kyivge mümkün kelmesi aqqında aytıp, o Qırım ile bağlı mevamını “açıq-aydın” bildirmek kerek, dep ayttı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.