Herson vilâyetiniñ işğal etilgen Geniçesk şeerinde Rusiye qurğan mahkeme yerli sakinni «Noman Çelebicihan qırımtatar batalyonında» iştirak etüv içün 3,5 yılğa azatlıqtan marum etti, dep haber ete Qırımtatar Resurs Merkezi.
Rusiye tahqiqatınıñ malümatına köre, Geniçesk okrugınıñ sakini «Rusiyede yasaqlanğan Noman Çelebicihan qırımtatar batalyonı» terror teşkilâtında göñülli olaraq faal sürette iştirak etti».
Erkek üç yıl ve altı ayğa azatlıqtan marum etildi, cezasını sert rejimli koloniyada çekecek.
Qırımtatar Resurs Merkeziniñ yolbaşçısı Eskender Bariyevniñ «Suspilne» intervyüsında bildirgenine köre, rusiyeliler «Noman Çelebicihan qırımtatar batalyonı» ile alâqaları bar olğanında qabaatlanğan 33-ten çoq ukrayınalını tuta.
Onıñ aytqanına köre, Rusiye uquq qoruyıcıları işğal etilgen topraqlarda yaşağan Ukrayına vatandaşlarını qorquzmağa tırışa, Rusiye mahsus hızmetleriniñ semereli işini köstermege ve Qırımda faal çalışqanlarını komandanlığına bildirmege tırışa.
Qırımda «Noman Çelebicihan qırımtatar batalyonında» iştirak etüv manaçığınen onlarnen vatandaş taqip etile. Bir çoq kişi apis cezalarını aldı ve Rusiye apishanelerinde tutula.
Rusiye FSBsi «Noman Çelebicihan qırımtatar göñülli batalyonını» 2022 senesi «terror teşkilâtlar» cedveline kirsetti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.