Orta küz ayınıñ 24-ne keçken gecesi Rusiye ordusı Ukrayinağa 128 ücüm uçağınen ücüm etti, olardan 90-ğa yaqını "Şahed" edi, olarnıñ bir qısmı Çauda burnu ve Qırımnıñ Sarabuz qasabasından uçurıldı, dep bildirdi Ukrayina Arbiy-ava quvetleri.
Saat 9-larda berilgen ilk malümatlarğa köre ava mudafaası tarafından memleketniñ şimalinde, cenübinde ve şarqında 72 duşman "Şahed", "Gerber" ve diger tipteki pilotsuz uçaqları urulıp tüşürilgen.
Ukrayina arbiyleriniñ aytqanına köre, 10 yerde 47 ücüm pilotsız uçaq urğan.
Rusiye arbiyleri bu ücümni şimdilik izaatlamadı.
Rusiye arbiyleri Ukrayina regionlarına çeşit silâlardan muntazam sürette ücüm ete.
Rusiye yolbaşçılığı, Rusiye ordusınıñ büyük cenk vaqtında Ukrayina şeerleri ve köyleriniñ grajdan infraterkibine maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.