Rusiye gece Kıyivge ücüm etti, ücüm neticesinde bir insan elâk oldı, dep bildirdi Kıyiv şeeriniñ arbiy memuriyetiniñ yolbaşçısı Timur Tkaçenko.
KMVA yolbaşçısı evel Rusiye ücüminden sebep bütün Kıyivde, aman-aman er bir rayonda çoq qatlı binalar zarar körgenini bildirdi. Hususan, Podol, Solomensk, Svâtoşın, Desnânsk, Obolon rayonlarında mesken evlerde yanğınlar olğanı belli, Şevçenko rayonında ise memuriy bina yanmaqta.
Fevqulâde vaziyetler devlet hızmeti bildire ki, Ğolosiyevo rayonında hastahanede yıqılğan parçalar oldı, diger adres boyunca 15 kvadrat metrlik binada yanğın söndürildi.
Kıyiv şeer başı Vitaliy Kliçkonıñ malümatına köre, şimdilik 25 insan zarar kördi.
"Aqmescitte duşman ücüminiñ neticesinde 25 insan yaralandı. Olarnıñ arasında 10 yaşındaki bala bar. 9 insan hastahanege alındı, şu cümleden, hamile qadın. Digerlerine ise yerinde yardım etildi", — dep yazdı o telegramda.
Polisniñ malümatına köre, Dnipro, Podol, Şevçenko, Solomensk, Ğolosiyevo, Svâtoşın, Darnıtsâ, Desnânsk ve Obolon rayonlarında 30-ğa yaqın ev zarar kördi. Sağlıq müessiseleri, cemaat naqliyatı, ofis binaları, tükânlar ve naqliyat vastaları zarar kördi.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.