Böylece, Aqyarnıñ merkezinde saat dört buçuqlarda atışqa beñzegen küçlü patlav sesleri eşitildi. Qırım.Aqiqat mühbiriniñ bildirgenine köre, ava telükesi şu saatta ilân etilmegen edi.
Aqyarnıñ Rusiye yolbaşçısı Mihail Razvojayev şeerdi üzerinde 5 dron urıp tüşürilgenini iddia ete. Dron parçaları Andreyevka, Orlovka ve Kaça civarında tüşken.
Soñradan RF Mudafaa nazirligi Qırım ve Qara deñiz üzerinde 9 dron urıp tüşürildi ve 8 tutıldı dep bildirdi. Muarririyette bu bildirmeler doğru olıp olmağanına dair malümat yoq.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.