"Krımskiy veter" telekanalı bildirdi ki, Kirovskoye uçaq alanı civarında üç patlav eşitildi, biri — "Kirovskoye" demir yol stantsiyası üstünde, daa biri — Canköy civarında.
Daa soñra "Krımskiy veter" şaatlarğa atıf etip, gece Kirovskiy ve Canköy rayonında Rusiye arbiyleri 5 dronnı urıp tüşürgenini bildirdi.
Rusiye Mudafaa nazirligi bildirgenine köre, gece Qırım üzerinde eki uçucısız uçaq yoq etildi. Rusiye akimiyetiniñ beyanatları mustaqil şekilde tasdıqlanmalı.
Keçende Aqyarnıñ rusiyeli başı Mihail Razvojayev şeerge uçaqsuz uçucılar ücüm etti, dep bildirdi. Onıñ bildirgenine köre, Qara deñizde dört uçaqsız uçaq ve ekipajsız kater ururdı. Aynı zamanda yerli telegram kanalları patlavlar aqqında haber etmedi. Razvojayevniñ aytqanlarını tasdıqlağan deliller yoq.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.