İlk yaznıñ 25-ne keçer gecesi Qırım ve Aqyar kene uçıcısız uçaqlarnıñ ücümine oğradı. Aqyarda gece saat 0:34-ten saba saat 6:18-ge qadar devam etken ava telükesi aqqında şeerniñ Rusiye kontrolindeki başı Mihail Razvojayev bildirdi, Qırımdaki uçucısız telüke aqqında Rusiye Fevqulâde vaziyetler nazirliginiñ idaresi haber ete edi.
Aynı zamanda Qırımnıñ telegram kanallarında Qırım yarımadası territoriyasında dronlarnıñ uçması ve patlavlar aqqında haber etile edi. Hususan, "Krımskiy veter" telegram-kanalı yerli sakinlerge atıf eterek, Aqmescit ve Aqmescit rayonında, Aqyar, Kezlev, Yaltada ve Rusiyeniñ "Qaçı" uçaq alanı civarında patlavlar aqqında yazdı.
Bundan da ğayrı, "Krımskiy veter" bildirgeni kibi, ücümge Aqmescit rayonınıñ Denisovka köyü yanındaki Tavriçeskaya TES da tüşti. NASA Firms uydu hızmeti bu obyektniñ cenübinde yanğınnı qayd etti. Balıqlava TES-i kene ücüm ete bile edi, amma bu malümatnıñ tasdıqlanması şimdilik yoq.
İlk yaznıñ 25-nde saba Razvojayev, Aqyarda elektrik teminlevi sıñırlandı, dep bildirdi. Onıñ aytqanına köre, bu "telüke sebebinden" kerek, şeerge ücümni izaatlamadı.
Rusiyeniñ "Voda Krıma" şirketi saba Aqmescit ve Qarasuvbazar, Bağçasaray, Canköy ve Keriç rayonlarında suv olmağanını bildirdi.
Ukrayina arbiyleri gece ücümini şimdilik izaatlamadı.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.