Qırımda «gaz borusındaki diversiya davası» boyunca mahküm etilgenler bir kün aş ve suvsız tutuldı, dep bildirdi dava mabüslerinden biri Asan Ahtemov qırımtatar faali Elmaz Ametova derc etken mektüpte.
Asan Ahtemovnıñ bildirgenine köre, onı Aziz Ahtemov ve Nariman Celâlnen beraber SİZOdan Rusiye mahkemesine «mahkeme oturışuvlarınıñ ses protokollarınen tanış olmaları içün» saba 4-te turğızıp alıp ketmege başladılar.
«Üyle vaqtına qadar diñledik, soñra teneffüs yapmağa rica ettik, çünki aşamağa kerek edi. Bizni bir saat oturğan boksqa alıp kettiler. Qanunğa köre aş bermediler, SİZO azır aşlarnı aynıñ soñuna qadar bermeycek, dep aytqanlar. Sabadan başlap aş ve suvsız edik», – dep bildirdi Asan Ahtemov.
Onıñ aytqanına köre, Nariman Celâl Rusiye mahkemesine saat 07:00-den 22:00-ğa qadar «suv ve aşsız olmağa» mecburlar, dep «añlatmağa tırıştı», amma «bir uzlaşuv olmadı».
Rusiyeniñ cezalarnı yerine ketirüv federal hızmeti Qırımda «gaz borusındaki diversiya davasınıñ» mabüsleri bergen malümatnı açıq-açıq izaatlamay.
Rusiye kontrolindeki Qırım Yuqarı mahkemesi sentâbrniñ 21-nde Anğarada «gaz borusındaki diversiya davasınıñ» mabüslerini uzun apis müddetlerine üküm etti: Nariman Celâl 17 yılğa ve 700 biñ ruble para cezasına, Asan Ahtemov 15 yılğa ve 500 biñ ruble para cezasına, Aziz Ahtemov 13 yılğa ve 500 biñ para cezasına üküm etildi.
Ukrayına Tış işler nazirligi, Ukrayınanıñ Qırım Muhtar Cumhuriyetindeki temsilciligi, Qırımtatar Milliy Meclisi ve aq qorçalayıcılar Celâl ve ağa-qardaş Ahtemovlarğa çıqarılğan ükümni takbih ettiler.
Avgustnıñ 23-nde «Qırım platforması» ekinci halqara sammitiniñ iştirakçileri Rusiyeni Nariman Celâlnı ve bütün qırımlı siyasiy mabüslerni azat etmesine çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.