Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı. Bu aqta fevralniñ 14-nde Qırım ve Aqyardaki Rusiye FSB idaresiniñ matbuat hızmeti bildirdi.
«Rusiye Ceza kodeksiniñ 205.5 maddesiniñ 1-inci, 2-nci qısmındaki (terrorist teşkilâtınıñ faaliyetini teşkil etüv ve iştirak etüv) cinayet alâmetleri boyunca açılğan cinaiy işniñ tahqiqatı çerçivesinde Qurman rayonında «Hizb ut-Tahrir al-İslami» terrorist teşkilâtınıñ qurucısı ve azaları qayd olğan ve yaşağan yerlerde tintüvler keçirildi. Tintüv vaqtında ekstremist edebiyatı, bilgisayarlar ve bağ vastaları alındı. Şübheliler yaqalandı», – dep qayd ete FSB matbuat hızmeti.
Rusiye uquq qoruyıcıları tutuv videosını da derc etti.
Daa evel Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları qırımtatarlarnıñ evlerini tinte, dep haber etilgen edi. «Qırım birdemligi» birleşmesiniñ malümatına köre, Aqmescitteki FSB idaresine Eskender Abdulğaniyev, Arsen Abhairov ve Rustem Emirüseinov alıp ketirildi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.