İşğal etilgen Qırımda FSB hadimleri beşinci Bağçasaray "Hizb ut-Tahrir davası" boyunca tevqif etilgen altı qırımtatarnı beş saat devamında qollarında qırmaça ile tutqan. Bunı "Qırım birdemligi" cemaat birleşmesi haber etti.
Advokat Edem Semedlâyevniñ sözlerine köre, yaqalanğanlar koridorda oturğıç üstünde otura edi, qolları arqada ve qırmaçada edi, közleri baylı, başları ise tizlerine sıqılı edi.
"Olar meni körmedi. Pek yüksek sesnen selâmlaştım, olar cevaplandı, amma közlerini açmadılar. Olarğa qaba tarzda böyle alda oturmağa emir etilgenini añladım. Qolları ise arqalarında edi", - dep bildirdi advokat.
Tahqiqatçı Vitaliy Vlasov böyle areketlerniñ sebebi binada birisi özüni öldürmege istemesi oldı, dep bildirdi. Yaqalanğanlar yerleştirilmek kerek olğan yer ise qapalı edi.
Avgustnıñ 24-nde Bağçasarayda ve Bağçasaray rayonında Rusiye uquq qoruyıcıları qırımtatarlar Ruslan Asanov, Seydamet Mustafayev, Remzi Nemetulayev, Abdulmecit Seytumerov, Amethan Umerov ve Eldar Yakubovnıñ evlerinden tintüv keçirdi. Bundan soñ olarnı Aqmescitteki FSB binasına alıp ketkenler. Avgustnıñ 25-nde Rusiye mahkemesi olarnı eki ayğa SİZOğa yolladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.