Rusiye Federal telükesizlik hızmeti işğal etilgen Aqyarda Ukraina Mudafaa nazirliginiñ istihbaratı içün casuslıq yapqanından şübheli sayılğan rusiyeli qadın tutulğanını haber ete.
Bu aqta Rusiye kütleviy haber vastaları Rusiye FSBsiniñ Cemaat bağları merkeziniñ malümatına esaslanıp bildire.
«Rusiye Federal telükesizlik hızmeti Rusiye vatandaşını devlet hainliginden şübheli sayıp, Aqyarda yaqaladı, qadın Ukraina mahsus hızmetleri tarafından celp etildi ve Ukraina Mudafaa nazirliginiñ Baş istihbarat idaresiniñ vazifesi üzerine arbiy malümatnı gizli şekilde toplağan edi», – dep aytıla müessiseniñ haberinde.
FSB, «devlet hainligi» maddesine istinaden cinaiy dava açıldı, tahqiqat tedbirleri keçirile», dep bildirdi.
Diger mustaqil menbalar bu malümatnı tasdıqlamay. Tutulğan qadınnıñ adı ve soyadı aydınlatılmay, onıñ izaatları yoq. Ukraina Mudafaa nazirligi de FSB malümatını şimdilik izaatlamadı.
Bu ay FSB, Ukrainadan vazife alıp, arbiy malümat toplağanında şübheli sayılğan kişiniñ tutuluvı aqqında ekinci kere haber ete. Tahminen bir afta evelsi devlet hainligi davası Cenübiy arbiy okrugınıñ arbiyine qarşı açıldı. Kütleviy haber vastalarınıñ malümatına köre, onıñ adı Ruslan Artıkov ola.
2019 senesi fevral ayında Rusiyede arbiy mahkeme Rusiye Qara deñiz flotunıñ mayorı, sabıq ukrain arbiyi Dmitriy Dolgopolovnı devlet sırını aydınlatqanı içün ve, FSB aytqanı kibi, onıñnen beraber yaşağan Anna Suhonosovanı devlet hainliginde qabaatladı.
Olarnı 10 ve 9 yılğa üküm ettiler. Rusiye tahqiqatınıñ malümatına köre, Suhonosova Ukraina Mudafaa nazirliginiñ Baş istihbarat idaresiniñ hadimi, polkovnik İgor Klimenko ile añlaşıp, Dolgopolovnı Ukraina mahsus hızmeti ile para alıp, gizli işbirligine celp etildi. Rusiye FSBsiniñ malümatına köre, mahkeme vaqtında Dolgopolov ve Suhonosova «qabaatlarını bütünley tanıp, yapqanlarına peşman olğanlar».
Qırımda tutulğan Dmitriy Dolgopolovnıñ eski arbiy arqadaşları Rusiye FSBsiniñ «Ukraina casusı olıp çalışqanına» dair versiyasına inanmay.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.