Frenkistanda Rusiye Federal telükesizlik hızmetiniñ Interpolğa talabınen tutulğan qırımlı İlnur Şağayevni Frenkistannıñ Yuqarı istinaf mahkemesiniñ qararı ile azat ettiler. Bunı boş aynıñ 10-nda Qırımtatar Milliy Meclisiniñ reisi Refat Çubarov Facebook saifesinde bildirdi.
Çubarovnıñ aytqanına köre, Şagayev 2025 senesi quralaynıñ 20-nde qorantasınen İrlandiyağa ketmek içün (anda muvaqqat qoruv statusı bar) Şerburda paromğa mingende, tutulğan edi. Bu aqta oraq ayında Qırımtatar resurs merkezi haber etken edi.
"Rusiye tarafınıñ İlnur Şagayevge qarşı bütün delilleri vaqtınca işğal etilgen Qırımda tutulğan şahıslardan işkence altında alınğan malümatqa esaslana edi. Qırımtatar Milliy Meclisi Ukrayina vatandaşı İlnur Şagayevniñ aqlarını qorçalap, Frenkistan tarafına ve Ukraina Tış işler nazirligine Ukrayina vatandaşlarına nisbeten istilâcı devletniñ talaplarını yerine ketirmemek çağıruvı ile muracaat etti. Ukrayina Tış işler nazirliginiñ ve Frenkistandaki Ukrayina elçiliginiñ diplomatlarınıñ büyük ğayretleri sayesinde mahkeme esnası İlnur Şagayevni bütünley aqladı", — dep yazdı Çubarov.
O, şunı da qoştı ki, Frenkistannıñ Yuqarı istinaf mahkemesi, Frenkistan uquq qoruyıcı organlarınıñ İlnur Şagayevge nisbeten areketleri "ayrı, amma emiyetli aspektlerde milliy qanunlarnıñ şimdiki qaidelerini bozğanını" tanıdı.
Çubarovnıñ aytqanına köre, Şagayevni orta küz ayınıñ 22-ne qadar sürgün etüv lagerinde tuttılar. O, Frtnkistannı tek boş aynıñ 7-nde terk ete bildi.