Frenkistan delvte başı Emmanuel Makron Kıyivde Ukrayina prezidenti Volodımır Zelenskıy ile körüşken soñ Frenkistan, Almaniya, İtaliya ve Romaniya Ukrayinağa AB namzet statusınıñ berilmesini destekley, dep bildirdi .
"Biz dördümiz de deral namzet statusınıñ berilmesini destekleymiz", - dedi o.
Evel, Politico neşri bazı memurlarğa atfı etip, Avropa şurası Ukrayinağa Avropağa qoşulmaq içün resmiy namzet statusınıñ berilmesini tevsiye etecegi aqqında bildirgen edi.
Daa evel, bazı Avropa liderleri, şu cümleden Frenkistan devlet başı ve Almaniya kantsleri Ukrayinağa AB ile munasebetlerni quvetleştirmek içün belli bir şartlı status berilmesiniñ daa faydalı olacağını tüşüngenleri haber etilgen edi.
Ukrayinanıñ baş naziriniñ Avropağa integratsiya meseleleri muavini Olga Stefanişina, AB-niñ eki memleketi Ukrayinanı şimdilik namzet kibi körmegenini bildirgen edi.
Bloomberg agentliginiñ malümatına köre, Daniya ve Felemenk Avropa Birligine qoşulmaq içün Ukrayinağa azalıq namzeti statusınıñ berilmesine qarşıdır.
Fevralniñ 28-nde Ukrayina prezidenti Volodımır Zelenskıy AB azalıq arizasını imzaladı.
Ukrayinağa azalıq namzeti statusınıñ berilmesine dair qarar bir ağızdan qabul etilmelidir.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.