Felemenk ükümeti Kremlniñ qırımlı siyasiy mabüsleriniñ imayecisi olğan işğal etilgen Qırım advokatı Lilâ Gemecige «İnsan aqları lâlesi» mukâfatını berdi.
«Bu mukâfat aq qorçalayıcı faaliyet içün ve bundan ziyadesi yoq. Añlağanıma köre, elçihane meni sayladı. Namzetimni teklif etken oldımı bilmeyim. Bunıñ teşebbüsçisini de bilmeyim. Biz mukâfatlar içün çalışmaymız ve olarnı almaq bizim maqsadımız degil», – dep ayttı advokat Qırım.Aqiqat mühbirine.
Onıñ qayd etkenine köre, bu mukâfat ittifaqdaşlar ve dostlar «adaletsizlikke qarşı küreşte» bar olğanını köstere.
«Bu qıymetli bir şey, elbet. Mence, tek menim muvafaqiyetim degil. Qırımda çalışqan bütün advokatlarnıñ mukâfatıdır. «Qırım birdemligi» faalleriniñ mukâfatıdır. İnsan aqlarını qorçalağanı içün taqip etilgen bütün insanlarnıñ mukâfatıdır», – dedi Gemeci.
Haber etilgenine köre, dekabrniñ 5-nde, Dünya insan aqları künü arfesinde, Felemenkniñ Ukraina elçisi Yennes de Mol «İnsan aqları lâlesi» mukâfatını Qırım ve Odesa aq qorçalayıcılarına berecek.
Lilâ Gemeci Bağçasaraydaki ekinci «Hizb ut-Tahrir davasınıñ» mabüsleriniñ ve vicdan mabüsi tanılğan «Qırım birdemligi» cemaat birleşmesiniñ koordinatorı Server Mustafayevniñ imayecisi ola.
«İnsan aqları lâlesi» – Felemenk Tış işler nazirliginiñ teşebbüsiniñ tesis etilgen ükümet mukâfatıdır. 2008 senesinden berli insan aqlarına qoltutqan aq qorçalayıcı ve teşkilâtlarğa berile. 2018 senesinden itibaren Felemenk ükümeti bütün dünyada yapqan işi içün telükede olğan faal ve aq qorçalayıcılarğa yerli mukâfatlar bere.