Orta küz ayınıñ 15-nde tutulğan dört qırımtatar qadını — Esma Nemetullayeva, Nasibe Saidova, Elviza Aliyeva ve Fevziye Osmanova — Rusiye akimiyeti tarafından terroristik teşkilâtnıñ faaliyetini teşkil etüvde ve böyle teşkilâtnıñ faaliyetinde iştirak etüvde qabaatladı. Bu aqta Qırımtatar resurs merkezine tutulğan qadınlardan birisiniñ adliyecisi Emil Kurbedinov bildirdi.
Advokat dedi ki, orta küz ayınıñ 16-nda mahkeme oturışları keçirilecek, anda apiske alınğanlar içün sıñırlav tedbirini saylaycaqlar.
"Menim añlağanıma köre, FSB apis etilüvni talap etecek", -—dedi Kurbedinov.
Bugün saba Rusiye tarafından işğal etilgen Qırımda Bağçasaray rayonında ve Aqyarğa bağlı köylerde qırımtatarlarnıñ evlerinde tintüvler keçirildi.
Bağçasarayda çoqbalalı ana ve siyasiy mabüs Remzi Nimetullayevniñ ömür arqadaşı Esma Nimetullayeva, Bağçasaray rayonınıñ Zalanköy köyünde pedagogika kolleciniñ studenti Nasıba Saidova, Bağçasaray rayonınıñ Toçıköy köyünde Elviza Aliyeva ve Aqyar rayonınıñ Mamaşay köyünde Fevziye Osmanovanıñ evlerinde keçirildi.
Yaqalanğan qadınlarnı Aqmescitke, "Qırım Cumhuriyeti ve Aqyar şeeri boyunca RF FSB idaresine" alıt kettiler.