"Evimizni elimizden aldılar, amma Ukrayinanıñ ğalebesine işançımıznı degil". Rusiye arbiyleri Bekirovlar ailesiniñ evine nasıl "yerleşti"

Rusiye arbiyleri Kremlniñ sabıq siyasiy mabüsi Edem Bekirovnıñ işğal etilgen Herson vilâyetiniñ Novooleksiyivka qasabasındaki evine yerleşken. Bekirovnıñ sözlerine köre, başta Rusiye arbiyleri bir qaç kere olarnıñ evine tintüvnen kelgenler, soñra qapını bozıp açqanlar ve anda yerleşkenler. Bekirovlar ailesiniñ ve eviniñ ikâyesini Qırım.Aqiqat materialında aytıp beremiz.

Edem ve Gülnara Bekirovlar Herson vilâyetiniñ Novooleksiyivka qasabasında otura ediler. Bu qasaba 2022 senesi fevralniñ 24-nde Rusiye ordusınıñ Ukrayina qıtasına keniş mıqyaslı ücümge başlağanı işğal etilgen Qırım ile memuriy sıñırnıñ yaqınlarında yerleşe. Novooleksiyivka ücümniñ ilk saatlarında işğal etildi.

Keniş mıqyaslı cenk başlanğanda sabıq siyasiy mabüs Edem Bekirov Rusiye apishanesinden azat etilgen soñ Kıyiv hastahanesinde tedaviy köre edi.

O zaman Geniçesk rayon devlet memuriyetiniñ reis muavini olaraq Novooleksiyivkada qalğan Gülnara Bekirova işğal altında qaldı. Amma o Kıyivge çıqıp ketip oldı. Şimdi aile Türkiyededir, anda Edem Bekirov tedaviyini devam ete. Amma vatanlarından endişeli haberler kele.

"Bizim içün cenk doquz yıl evel başlandı"

Gülnara Bekirovanıñ sözlerine köre, Novooleksiyivkada yerli sakinler pek çoq Rusiye arbiyni ve adiy urba kiyip yürgen bellisiz adamnı köreler. Olar soqaq boyu ketken adamlarnı toqtatalar, sorğulaylar ve olarnıñ cep telefonlarını teşkereler.

Nümüneviy resim

Gülnara Bekirova, Herson vilâyeti işğal etilgen soñ rusiye arbiyleri olarnıñ evini üç kere tintkenini bildire. İlk sefer 2022 senesi aprel ayında, soñra iyün ve noyabr aylarında. Evde o zaman Bekirovlarnıñ qart soyları buluna edi.

"Olar evimizge sürip kirdiler, qapını baltanen parladılar, pencereni sındırdılar. O zaman bizim evimizde qalğan qart anam bütün bularnıñ şaatı oldı. Arbiyler avtomat ve uzun süngülernen keldiler. Episi odalarnı dolaşıp, yataqtaki minderlerni teşip-teşip çıqtılar. Anam "mında ne qıdırasıñız" dep soray edi. Olar cevap bile berip olamadılar. Evimizde Quran taptılar ve "bu ne" dep soradılar. Birisi bu dualar kitabı olğanını añlattı. Ğaliba kelgenler arasında musulman da bar edi", - dedi Gülnara Bekirova.

Keçken seneniñ aprel ayında tintüv vaqtında Rusiye arbiyleri Bekirovlarnıñ evinden cüzdanlar, defterler ve kitaplarnı alıp çıqtılar. Bunı o zamanki Ukrayina Ombudsmanı Lüdmila Denisova bildirgen edi.

Onıñ sözlerine köre, tintüv vaqtında arbiler Gülnara Bekirova ve onıñ qızı Eleonora Bekirova aqqında soraştırğanlar.

Gülnara Bekirova, Rusiye arbiyleriniñ diqqatını Ukrayina tarafdarı olğanı içün çekkenini saya. 2014 senesinden o Qırımnıñ Rusiye tarafından işğaline qarşı aktsiyalarda iştirak etip keldi, 2022 senesi mart ayında ise Novooleksiyivkada Rusiye tankları yerleşken zaman fikirdeşleri ile birlikte adamlarnı Ukrayinanıñ işğaline qarşı mitinglerge toplağan edi.

"100 yıl evel antlı qurbanımız, ulu şeitimiz Noman Çelebicihannıñ "Qırımnı qanğa boğa bilirler, yurtnı ateşke bere bilirler, er şeyimizni mahv ete bilirler… Faqat bütün bular qırımlılarnıñ istiqlâl imanlarını yıqmağa degil, onı quvetlendirmege yaraycaqtır. Tarihnıñ erte-keç yaşaycaq şeyi – mustaqil ve mesut Qırımdır…" degen sözleri bugünde-bugün pek aktualdir. Bugün evlerimizni, maşnalarımıznı tutıp aldılar, amma adaletsizlikke qarşı küreşüv içün quvetimizni ve Ukrayinanıñ ğalebesine işançımıznı tıtıp alamazlar. Bizim içün cen 9 yıl evel başlandı ve alâ daa devam ete. Bir çoq semetdeşimiz yıllardır Rusiye apishanelerindedir, çoqusı evlerinden marum qaldı. Şunıñ içün biz mıtlaqa yeñmelimiz ve evlerimizge qaytmalımız", - dey Gülnara Bekirova.

"Bizim aziz yerimiz"

Bekirovlar ailesi 35 yıl Novooleksiyivkadaki evlerinde yaşadı. Bu ev Edem Bekirovğa Sovet yıllarında agronom studenti olaraq köyde ameliyatta olğan zamanı berildi. Tezden o evlendi ve evde genç aile yaşamağa başladı.

Edem Bekirov

"Bütün evlilik ayatımıznı bu evde yaşadıq. Bu bizim aziz yerimiz. Bu evni yañıdan qurdıq, donattıq, bağça ve bağ östürdik. Anda qızımız Eleonora doğdı. Evimiz soqaqnıñ soñunda olsa da, qapılarımız daima açıq edi, pek çoq adam kele edi", - dey Bekirova.

Bekirovlarnıñ azbarındaki bağ ve bağça

2018 senesi dekabr ayında Gülnara Bekirova Qırım.Aqiqat mühbirlerini öz evine davet etken edi. O zaman mühbirler Edem Bekirov aqqında material azırlay edi. Evniñ qorasında o zaman qırımtatar bayrağı yelpirey edi.

Qırımtatar milliy bayrağı. Edem ve Gülnara Bekirovlarnıñ eviniñ azbarı. 2018 senesi

Ev odalarnıñ birinde Gülnara Bekirova Qırım.Aqiqat mühbirlerine aile resimlerini köstergen edi.

Kreml sabıq siyasiy mabüsi Edem Bekirovnıñ ombr arqadaşı Gülnara Bekirova. 2018 senesi

"Terek, çeçek ve azbarğa quvana ediler"

Gülnara Bekirovanıñ ana-babası da uzun yıllardır Novooleksiyivkada oturalar. Olar 1967 senesi aileleriniñ evel Qırımdan sürgün etilgeni Özbekistandan kelip bu qasabağa yerleşkenler. Başta onıñ tuvğanları Qırım yarımdasına yerleşmege tırışqanlar, amma yerli akimiyet uzun zamandır qırımtatarlarğa anda yerleşemege izin bermey edi. Ve olar Qırımğa eñ yaqın demiryol stantsiyasınıñ yerleşkeni Novoooleksiyivkada qalmağa mecbur olğanlar.

Novooleksiyivkadaki demiryol vokzalı

Rusiyeniñ Ukrayinağa büyük istilâsından evel, resmiy malümatqa köre, bu qasabada dört biñge yaqın, umumen Herson vilâyetinde 10 biñ qırımtatar yaşay edi.

Bekirovlarnıñ qızı Eleonora tuvğanlarınıñ Herson vilâyetindeki ayatını olar içün "Qırımda, öz vatanında yaşamaq arzusınıñ arzu olaraq qalması" kibi qıymetlendire. Amma balalığı anda keçkeni içün Novooleksiyivkadaki evini samimiyetnen hatırlay.

"Menim evime Rusiye işğalcileri sürip kirdiler. Qapını parlap, pencerelerni sındırıp, anda yerleştiler. Doğğanım, balalığımnı keçirgenim ev. Mektepten uzaq olğan evim, amma buña baqmadan biz tatamnen büyük isteknen anda bara edik. Terek, çeçek ve azbarğa quvana edik. 2014 senesi yaşayışımız tersine çevirildi. 2022 senesi yaşayış yüz bergen deşet içinde tamamınen toqtap qaldı", - dep yazdı o Facebook saifesinde.

Eleonora Bekirova

Gülnara Bekirova Qırım.Aqiqatqa Herson vilâyetiniñ işğalden tezden azat etilecegine, evlerine qaytıp olacaqlarına ve Ukrayinağa qarşı cenkke alâqası olğan er kesniñ ceza çekecigine ümüt etkenini bildirdi.

MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.