Mayısnıñ 30-nda saba Rusiye quvetçileri tarafından Eski Qırımda evinde keçirilgen tintüvden soñ bellisiz tarafqa alıp ketilgen qırımtatar Ridvan Rustemov azat etilgen. Bunı "Qırım birdemligi" cemaat birleşmesi haber etti.
"Kündüz saat 13:00. Ridvan Rustemovnı yiberdiler. Onı tuvğanları ve dostları qarşılap aldı", - dep haber ettiler faaller.
Tintüvniñ ve yaqalavnıñ sebepleri şimdlik belli degil. Rusiye quvetçileri de bu adiseni izaatlamay.
Mayısnıñ 30-nda saba Rusiye quvetçileri Eski Qırımda qırımtatar Ridvan Rustemovnıñ evinde tintüv keçirdi. Haber etilgeni kibi, tintüvden soñ Rustemovnı iş mikroavtobusqa oturtıp bellisiz yerge alıp ketkenler.
Evel Qırımtatar resurs merkezinde bu yılnıñ ilk üç ayında Rusiye tarafından işğal etilgen Qırımda quvetçiler 49 kere qırımtatarlarnı yaqaladılar, dep haber etken ediler. Merkeziniñ malümatına köre, Qırımnıñ işğali devrinde ğayıp olğan 21 aqqında alâ daa bir şey belli degil, olardan 15-i qırımtatardır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.