"Ervin İbragimov qayda? 10 yıl cevapsız" — Kıyivde, hırsızlanğan Qırımtatar faali aqqında laf ettiler

2026 senesi Quralaynıñ 25-inde, Qırımtatar faali, Bütündünya Qırımtatar kongressiniñ icra komitetiniñ azası Ervin İbragimovnıñ hırsızlanuvınıñ 10 yıllığına bağışlanğan fotoresim sergisinde Kıyivdeki Qırım evinde Qırım.Aqiqat leyhasınıñ arhivinden fotoresimler taqdim etildi

"10 yıl cevapsız: Ervin İbragimovnıñ davası ve işğal vaqtında insan hırsızlavı sistemi" panel munaqaşasında aq qoruyıcılar, devlet institutları ve Qırımtatar Milliy Meclisiniñ vekilleri, şu cümleden onıñ lideri Refat Çubarov iştirak etti

İştirakçiler arasında Qırımtatar halqınıñ milliy lideri, sabıq dissident, Ukrayina halq deputatı Mustafa Cemilev de bar edi

Qırımtatar Milliy Meclisiniñ lideri Refat Çubarov, Rusiye tahqiqatı ne İbragimovnıñ bulunğan yerini taptı, ne şübhelilerni tuttı ve 2017 senesi tahqiqatnı resmiy şekilde toqtattı, dep hatırlattı

Tedbirde Ervin İbragimovnıñ hırsızlanmasınıñ yıllığına çıqarılğan vesiqalı video da kösterildi

Ervin İbragimov 2016 senesi Quralaynıñ 24-nde Bağçasarayda evge qaytqanda ğayıp oldı

Daa soñra İbragimovnıñ maşnasını yol ortasında anahtarı ile taptılar. Nezaret kameraları, bir qaç adamnı, tahminlerge köre, yol hızmetiniñ hadimleriniñ urbasında, onı küçnen mikroavtobusqa itep alğanını qayd etti.


Ervin İbragimov ğayıp olğan soñ Qırımda ve dünyanıñ bir çoq memleketinde onı qıdırmaq ve qaçırılğanını tahqiq etmek talabınen aksiyalar keçirildi

Ervin İbragimovnıñ soy-sopları ve aq qorçalayıcılar bir qaç kere tahqiqatnıñ semereli olmağanını bildirip, Rusiye quvetçileriniñ ya da olarnıñ kontroli altında olğan gruppalarnıñ alâqası bar olğanını tahmin ete ediler

Ervinniñ babası Ümer İbragimov tahqiqatnı areketsizlikte qabaatladı. Aynı zamanda Rusiye akimiyeti alternativ versiyalarnı köstere edi: satın aluv, ticariy çatışmalar ya da "Qırımdaki vaziyetni kerginleştirmek" ıntıluvı. Bu beyanatlarnı Qırımnıñ Rusiye prokurorı Natalya Poklonskaya yaptı

Dava, aq qorçalayıcılar muracaat etken soñ, Birleşken Milletler Teşkilâtınıñ mecburiy ya da mecburiy olmağan ğayıp oluvlar boyunca iş gruppası tarafından baqıldı