Dünya qırımtatar kongressi icra komitetiniñ azası, faal Ervin İbragimov 2016 senesi mayısnıñ 24-nde Qırımda hırsızlandı. O vaqıttan berli ondan bir haber alınamadı. İçtimaiy ağlardaki saifesi alâ daa aktiv. Vatandaşları ve ortaqları qırımlınıñ doğğan kününi hayırlay ve "sağ qaytmağa" rica ete. 10 yıl devamında Ervin İbragimovnı Ukrayina aq qorçalayıcıları ve uquq qoruyıcıları qıdıra. Olar eminler: onıñ hırsızlanuvı tek bir insannıñ ikâyesi degil, Rusiyeniñ Qırımda yapqan siyasetiniñ misalidir.
2014 senesine qadar Ervin İbragimov faal sürette cemaat faaliyetinen oğraşqan, Bağçasaray regional meclisiniñ azası ve Qırımtatar milliy areketiniñ iştirakçisi edi.
2014 senesi fevral ayında, Rusiye Qırım işğaliniñ arbiy qısmına keçkende, faal Ukrayina topraq bütünligine qoltutmaq içün fevralniñ 26-nda Qırım parlamenti ögündeki mitingde iştirak etti.
Rusiye Qırımnı qanunsız bir şekilde ilhaq etken soñ Ervin İbragimov faaliyeyetini toqtatmadı. O, açıq-açıq Ukrayinağa qoltuttı, semetdeşlerine destek oldı, Rusiye siyasiy taqipleriniñ qırımlı qurbanları qorantalarına yardım etti.
Ervin İbragimov – Qırımda Rusiye akimiyeti insan aqlarını boza dep açıq aytqanlardan biridir. İstanbulda Rusiye akimiyeti tarafından taqip etilgen qırımlılarğa uquqiy yardım merkezi quruluvınıñ teşebbüsçilerinden biri edi. Teşebbüsini ilân etken yarım yıldan soñ ğayıp oldı. Ervin İbragimov 2016 senesi mayısnıñ 24-nden berli bağğa çıqmay.
"Bir haber alınamadı"
O aqşam maşinanen işten evge qayta edi. Soñra açıq maşinası Bağçasaraydaki eviniñ yaqınlarında tapıldı. Faal ise izsiz bir şekilde ğayıp oldı.
Ervin İbragimov
Bu ğayıp oluv anı video kamerası tarafından qayd etildi.
Videoğa köre, Ervin İbragimovnıñ maşinasını o gece Bağçasaray yolunda Rusiye yol patrul hızmeti urbasında eki kişi toqtattı.
Faal maşinadan çıqqanınen onı mikroavtobusqa mindirmege tırıştılar.
Ervin İbragimov tirendi, qaçmağa tırıştı, amma beceralmadı.
Onı mikroavtobusqa mindirip, Bağçasaray suv anbarına taba alıp kettiler.
Bundan soñ olğanlar alâ daa belli degil. Bağçasaray sakini Ervin İbragimovnıñ vesiqalarını taptı: pasport, iş kitapçığı ve aydavcı şeadetnamesi.
Qırımlı cemaatçılıq yardımınen de qıdırıldı.
Qırımda hırsızlanğan Ervin İbragimov aqqında risale, 2016 senesi iyül ayı
Faalniñ ailesi onı qaytarğanlarğa para bermege teklif etken edi.
Ervin İbragimovnıñ tuvğanları onı Rusiye uquq qoruyıcılarınıñ yardımınen de tapmağa tırıştılar. Olar operativ areketler keçirip, qıdıruvnı tez-tez bitirdiler, taqdiri aqqında ise bir şey aytmadılar.
"Qırımdaki vaziyetni kerginleştirmek" içün ğayıp oldımı?
Rusiye uquq qoruyıcıları faalniñ ğayıp oluv versiyalarından biri "Qırımnıñ uquq qoruyıcı organlarına iftira atmaq içün Qırımdaki vaziyetni kergilenştirmesi" ola, dep ayttı.
O vaqıt Qırımnıñ Rusiye prokuraturasında yolbaşçı olğan Natalya Poklonskaya Ervin İbragimovnı "ğayıp olğanından bir aydan soñ sağ körgen ediler", dep aytqan edi. Başqa bir malümat ya da şaatlıq aydınlatılmağan edi.
«Ervin qayda?» Kyivde qırımlı Ervin İbragimovnıñ ğayıp oluv yılına aktsiya, 2017 senesi mayıs ayı
Açılğan cinaiy dava ve onı hırsızlağan insanlar ve maşinaları qayd etilgen video bar olğanına baqmadan, qıdıruv işi yapılmadı. Neticede dava toqtatıldıUkrayina prezidentiniñ Qırım Muhtar Cumhuriyetindeki temsilciligi
"Açılğan cinaiy dava ve onı hırsızlağan insanlar ve maşinaları qayd etilgen video bar olğanına baqmadan, qıdıruv işi yapılmadı. Neticede dava toqtatıldı. Ukrayina vatandaşları, faaller Rusiyeden Ervin aqqında malümat bermege talap etip, sistematik aktsiyalar keçirgen ediler. Buña baqmadan ve Avropa insan aqları mahkemesine, BM muracaatlarına baqmadan, Ervin İbragimov aqqında bir malümat alınamadı", – dep bildire Ukrayina prezidentiniñ Qırım Muhtar Cumhuriyetindeki temsilciligi.
Faaller Ervin İbragimov qıdırılğanına dair ilânlarnı tek Qırımda degil, Moskvada da tarqatqan edi, yerli hızmetler olarnı pek tez toplay edi.
Ukrayina uquq qoruyıcıları neticede Ervin İbragimovnıñ hırsızlanuvı planlaştırıldı, evi ise ğayıp olğanı arfesinde "taqip etilip başlanğan edi".
Rusiye uquq qoruyıcıları Ervin İbragimovnıñ hırsızlanuv davasını semereli bir şekilde alâ daa tahqiq etmedi, dep bildire müessise. Soy-sopları ve advokatqa neticede qapatılğan dava malümatlarınen tanış olmağa imkân berilmedi.
Rusiye uquq qoruyıcı organlarınıñ Ervin İbragimovnı qıdıruv neticelerine dair açıq cevabı yoq.
«Где Эрвин Ибрагимов? 10 лет без ответа» – в Киеве говорили о похищенном крымскотатарском активисте
"Ervin İbragimovnıñ davası – bir qorantanıñ faciası degil, Rusiyeniñ areketleridir"
Ervin İbragimovnı 2016 senesi iyül ayında Türkiyede Dünya Qırımtatar Kongressiniñ icra komiteti toplaşuvında bekley ediler – ğayıp olğanından eki ay keçken soñ. Qırımda qıdırılğanına dair ilânlar yapıştırıla edi.
Bağçasarayda Ervin İbragimovnıñ qorantası yaşağan evde qıdıruv ilânı, arhiv fotoresimi
Yalanğa qapılmañız – bu devlet halqımıznı yoq eteMustafa Cemilev
"Yaqın ve sevimli dostumız Ervinniñ bir qaç ay evelsi hırsızlanğanı pek kederli ve, mında aytılğanı kibi, ümüt etemiz ki, qaytıp qorantasına qavuşır. Amma kerçekçi olmaq kerek: Qırımda ğayıp olğan 22 insandan daa bir kişi bile tapılmadı. Böyle bir devletnen işimiz bar. Yalanğa qapılmañız – bu devlet (Rusiye – QA) halqımıznı yoq ete", – dep aytqan edi o vaqıt qırımtatar halqınıñ milliy lideri Mustafa Cemilev.
Ervin İbragimovnıñ hırsızlanuvında "tam bir siyasiy alâmet bar", Qırımda hırsızlanğan ve tutulğan diger Ukrayina vatandaşlarınıñ adiselerinde olğanı kibi, dep tüşüne Ukrayina prezidentiniñ Qırım Muhtar Cumhuriyetindeki temsilciligi.
"Bunıñ maqsadı Ukrayinağa qoltutuv numayışınen küreş, qırımtatar halqı aqlarınıñ ve bütün insanlarnıñ söz serbestligi aqlarınıñ bastırıluvı ola. Faalniñ vatandaş fikirleri sebebinden hırsızlanuvı ve alâ daa bir haber alınamağanı tek bir şey köstere: işğalci memuriyetniñ areketleri mümkün olğanı qadar tez toqtatılmalı ve cinayetke celp etilgenler cezalandırılmalı", – dep bildirdi Temsilcilik.
Ervinniñ davası – tek bir qorantanıñ faciası degil. Bu Rusiye işğali kelgen er angi topraqnıñ oğrağan vaziyet delilidirNikolay Polozov
Ervin İbragimovnı işğal etilgen Qırım yarımadasında bulunamağan Qırım Muhtar Cumhuriyetiniñ Prokuraturası da qıdıra.
"Ervin İbragimovnıñ ikâyesi – "ğayıp oluv" degil. Qırımnıñ Rusiye işğalinde eñ qorqunç areketlerden biridir: insan hırsızlavları, terror ve insanlarnı daimiy qorqu içinde tutuv ıntıluvıdır. Buça, İzüm ve tapılğan onlarnen işkence yerinden soñ bular "ayrı adiseler" edi, dep aytmaq imkânsız. Bu bir sistema. Rusiye bütün işğal etilgen topraqlarda qullanğan aynı usullar. Şunıñ içün Ervinniñ davası – tek bir qorantanıñ faciası degil. Bu Rusiye işğali kelgen er angi topraqnıñ oğrağan vaziyet delilidir", – dep ayta ğayıp olğan faalni qıdıruvda aileni temsil etken advokat Nikolay Polozov.
Nikolay Polozov
"Qırımtatar halqınıñ aqlarını qoruğanı içün oğlu Rusiye tarafından hırsızlandı"
Ervin İbragimovnıñ taqdiri belli olmağanınen onı qıdırğan ve beklegen insanlar kete. Mart ayında Bağçasarayda faalniñ anası – onı yıllarnen qıdırğan Leylâ İbragimova vefat etti.
Leylâ İbragimova
"Oğlunıñ taqdirinen bağlı yıllarnen devam etken beklev ve belgisizlik Leylâ hanımnıñ sağlığına pek yaramay tesir etti. Buña baqmadan, o, soñki nefesine qadar aman-aman on yıldan berli belli olmağan yerde qanunsız tutulğan Ervinden bir haber almağa ümüt etken edi", – dep ayttı Qırımtatar Milliy Meclisiniñ reisi Refat Çubarov.
Faalniñ babası Umer İbragimov oğlunı tapmaq içün yıllar berdi.
Umer İbragimov
O, 2016 senesi Qırımda Rusiye uquq qoruyıcılarından oğlunı qıdırmağa talap etti, yıllar devamında bütün seviyelerde malümat qıdırdı ve, onıñ fikirince, alâqası olğanlarnı aytqan edi.
FSB hadimleri tarafından ağzaviy qorquzuvlar alğan edi, dost ve tanışları buña şaat oldı, taqip etilgen ediUmer İbragimov
"Menim tarafımdan Ervinniñ hırsızlanuvı evelden planlaştırıldı ve Rusiye devlet organları tarafından yapıldı, dep tahmin etmek içün bütün sebeplerim bar. 2014 senesinden berli oğlum Qırım Rusiye tarafından qanunsız bir şekilde zapt etilgenini ayttı ve Rusiye repressiyağa oğratqan qırımtatarlarnıñ aqlarını imaye etken ve qoltutqan edi. 2014 senesi reberleri qorquzsa da, Bağçasaray memuriyetinden devlet hızmetinden ayırılğan edi. FSB hadimleri tarafından ağzaviy qorquzuvlar alğan edi, dost ve tanışları buña şaat oldı, taqip etilgen edi, bunı hırsızlanğanından evel aytqan edi, hırsızlanğanından bir qaç kün evelsi de onı hırsızlamağa tırışqan ediler, amma o vaqıt muvafaqiyetli olamadılar. Eminim, oğlum faal vatandaş firleri ve qırımtatar halqınıñ aqlarını imaye etkeni içün Rusiye tarafından hırsızlandı", – dep aytqan edi Umer İbragimov 2018 senesi Varşavada OSCE insan aqları konferentsiyasında.
O, Rusiye eyyetinden oğlunıñ hırsızlanuvına dair malümat istegen ve "bütün ürmetli eyyetlerden" onı qıdırmağa yardım etmege rica etken edi.
Ervin İbragimov oğlu qaytar dep er kün bekley ve Facebook saifesinde qave filcanlı bir fotoresimini derc etip yaza edi: "Vaqtınca olmağanından qavesini dost ve yaqınları içecek".
Qorantanıñ tuvğanları ve dostları doğğan kününde toplaşıp, qaytacağına ümütlerini saqlay edi.
Bağçasaraydaki evinde Ervin İbragimovnıñ fotoresimi, arhiv fotoresimi
"Ervinni hatırlaymız, amma asılında – episini"
Rusiye kelgeninen Qırımda tek Ervin İbragimov hırsızlanmadı. 12 yıl içinde yüzlernen qırımlı Rusiye uquq qoruyıcılarınıñ nomeri olmağan qara mikroavtobusqa mindirildi. Bazıları sağ çıqtı, bazılarından alâ daa haber alınamay.
Qırımda insanlar birisi tesadufen qırsızlansa, nevbette olar da ola bile, dep tüşüne edilerTamila Taşeva
"Ervin İbragimovnı hatırlağanda asılında Qırım işğali yıllarında hırsızlanğan bütün vatandaşlarımız aqqında aytamız. Onıñ taqdiri misalinde bulunğan yeri belli olmağan onlarnen diger insannıñ taqdirlerini dünyağa kösteremiz. Yarımadada insan hırsızlavları ealini qorquzmaq içün yapıldı. Qurbanlarnıñ cedveline baqsaq, bir qısmı Ukrayinağa qoltuta ya da faal edi, amma bazıları saylanğan edi. Bu tahminsizlik aselet telâş doğura edi, Qırımda insanlar birisi tesadufen qırsızlansa, nevbette olar da ola bile, dep tüşüne ediler", – dep bildire Ukrayina halq deputatı, Ukrayina prezidentiniñ Qırım Muhtar Cumhuriyetindeki Temsilciliginiñ sabıq reisi Tamila Taşeva.
Qırımtatar resurs merkezi Qırımnıñ qanunsız Rusiye ilhaqı başlağanınen reyegionda hırsızlanğan eñ az 29 insannı qayd etti. Çoqusı qırımtatarı ola, fikir ve baqışları Rusiye akimiyetine zıt kele.
Kyivdeki Rusiye elçihanesi ögünde «Qabaat ve ceza» aktsiyasında Qırımda ğayıp olğanlarnıñ fotosuretleri, arhiv fotoresimi
Teşkilâtnıñ malümatına köre, Qırımda Ervin İbragimovdan ğayrı ğayıp olğanlar: Rizvan Abduramanov, Arsen Aliyev, Server Aliyev, Marsel Alâutdinov, Eskender Apselâmov, Şevket Aripov, Muhtar Arislanov, İvan Bondarets, Valeriy Vaşçuk, Ruslan Ganiyev, Sergey Grişçenkov, İslâm Cepparov, Seyran Zinedin, Cevdet İslâmov, Maksim Kapliyenko, Yekaterina Klapova, Fedor Kostenko, Farhad Soliyev, Arsen Suyunov, Arlen Terehov, Vasiliy Çernış, Timur Şaymardanov, Marlen Şevketov, İsmail Şemşedinov, Susanna İsmailova, Anatoliy Kobzar, Oleg Platonov, Nataliya Polüh ve Tamara Çernuha.
Olar qayda sualine cevap şimdilik yoq.
Kyivde faal Ervin İbragimovnıñ ğayıp oluv yılına bağışlanğan aktsiyada ğayıp olğan qırımlılarnıñ adları, arhiv fotoresimi
"Ne yazıq ki, Kreml kontrolindeki Qırım akimiyeti tek bu adiselerni tahqiq etken kibi yapa, BM Baş Assambleyasınıñ A/RES/71/205 Qararına köre Rusiye işğalci devlet dep adlandırıldı ve bu topraqta insan aqlarına riayet etilmesinden mesüliyetli ola. Qırımtatar resurs merkeziniñ hadimleri ve ekspertleri BM, OSCE, PACE halqara meydançıqlarında halqara toplulıqqa insan aqları bozulğanını çoq seslendirgen edi. Qırımda tamır qırımtatar halqı ve Ukrayinağa qoltutqan faallerge basqı yapmaq ve qorquzmaq içün qullanılğan apis cezaları, tutuv ve hırsızlavlarnı takbih etemiz", – dep bildire Qırımtatar resurs merkezi.
Rusiye akimiyeti Ervin İbragimovnıñ ğayıp oluv davasını açıq şekilde izaatlamağan edi. İşğal etilgen Qırımdaki siyasiy repressiyalarnı ise inkâr ete.