İşğal etilgen Qırımnıñ şimalinde Ermeni Bazarda gece ava mudafaa sisteması çalıştı, dep haber ete Rusiye kontrolindeki şeer yolbaşçısı Vasiliy Telijenko.
«Ermeni Bazarnıñ ürmetli sakinleri! Raat olmağa rica etem, ava mudafaa sisteması çalışa», – dep yazdı Telijenko Telegram kanalında.
Rusiye Mudafaa nazirligi vaziyetni daa izaatlamadı. Ukrayına resmiy şahısları da vaziyetni şimdilik izaatlamay.
Avgust ayından berli Qırım ve Aqyarda aman-aman er kün patlav sesleri eşitile. Rusiye akimiyeti «Ukrayına uçucısızlarına» atış ve «ava mudafaa sistemalarınıñ işi» aqqında ayta.
Noyabrniñ 22-nde Rusiye kontrolindeki Qırım akimiyeti içtimaiy ağlarda yerli sakinlerniñ Ermeni Bazardan tahliye etilgenine dair «sahte haberler» tarqatıla, dep bildirdi.
RBK-Ukrayına neşiri OSINT-mütehassısı Bencamin Pittetniñ Twitterine esaslanıp, Rusiye ordusı şimaliy Qırımda okop qazıp başladı, dep bildirdi, hususan yañı qoruma inşaatları Ermeni Bazar şeeri yaqınlarında qayd etildi.
Noyabrniñ 2-nde Ukrayına prezidenti Volodımır Zelenskıy çeh televideniyesine intervyü berip, Ukrayına ğalebe qazanğan soñ Qırımğa ketmek niyeti aqqında ayttı. Ne vaqıt olacaq degen sualge Zelenskıy kesen-kes «qışta degil» dep, Ukrayına Rusiye ile cenkte yazğa yaqın ğalebe qazanır, dep ümütlerini bildirdi.
Oktâbrniñ 1-nde Ukrayına istihbarat yolbaşçısı Kırılo Budanov Natalâ Moseyçukqa intervyü berip, Ukrayına Silâlı quvetleri 2023 senesi baarniñ soñuna qadar Qırımğa kirer, dep ayttı.
Ukrayına prezidentiniñ ofis yolbaşçısınıñ mesleatçısı Mıhaylo Podolâk Qırım sakinlerini sığınaqlarnı teşkerip, Ukrayınanıñ «işğalden azat etüv areketleri» sebebinden suv yedeklerini azırlamağa çağırdı. Podolâk, Ukrayına prezidentiniñ ofisi işğal etilgen Qırım sakinleri içün tahliye marşrutlarını azırlay, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.