Ukrayina ve Türkiye prezidentleri Volodımır Zelenskıy ve Recep Erdoğan Rusiyeniñ cenkni toqtatmaq muzakerelerinde iştirak etüv meselesine farqlı yanaşuvlarını bildirdiler. Bunı siyasetçiler İstanbulda keçirilgen muzakerelerden soñ matbuat konferentsiyasında aytqan ediler.
''Başından berli cenkniñ muzakereler esasında bitmesine isse qoştıq. Biz Rusiye de celp etilecek barışıq sammitini qabul etmege azırmız", - dedi Erdoğan.
Türkiye devletiniñ yolbaşçısı Rusiyeniñ istilâsı başlağan soñ İstanbulda keçirilgen muzakerelerni hatırlattı.
"İstanbulda 2022 senesi mart ayında qurulğan muzakere masasını barışıq içün qullanmaq içün diplomatik adımlar atılmadı", - dedi Türkiye prezidenti, onıñ memleketi Ukrayinanıñ topraq bütünligi, suvereniteti ve mustaqilligine qoltuta, dep qayd etti.
Zelenskıy, Ukrayina, Dünya barışıq sammitinde Rusiye vekillerini körmey, dep qayd etti.
''Er şeyni blok etken, bozğan ve öldürgen insanlarnı nasıl davet etmege mümkün olğanını körmeymiz. Biz neticelerni isteymiz. Neticesi Ukrayina içün adaletli sulh. Şunıñ içün, ilk evelâ medeniy memleketler plan azırlaycaq, soñra adaletli barışıq istegen Rusiye vekillerini celp etecek", - dedi Ukrayina prezidenti.
Resmiy Kıyiv, Rusiye orduları halqara seviyede tanılğan Ukrayina territoriyasını terk etken soñ, Moskva ile er angi muzakereler mümkün olğanını defalarca qayd ete edi.
Erdoğan Rusiye ile alâqalarını saqlap qala. Hususan, o bir qaç kere Rusiye prezidenti ile körüşken edi, soñki sefer keçken sene sentâbr ayında. Ankara Ukrayina ve Rusiye arasında esirlerni deñişüv muzakerelerinde de iştirak etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.