Oraqnıñ 30-na keçer gecesi Lvivde Rusiye ücüminiñ neticesinde 30 insan zarar kördi, soñki malümatqa köre, 15-i hastahanege alındı, dep bildirdi vilâyetniñ arbiy memuriyetiniñ yolbaşçısı Maksim Kozitskıy.
Onıñ aytqanına köre, zarar körgenlerniñ arasında balalar bar, bir bala hastahanede.
Şeer yolbaşçısı Andrey Sadovıy bu "Lvivge yapılğan eñ büyük ücümlernden biri" olğanını bildirdi.
"4:45, ücüm, 20-den ziyade raketa. Paton soqağındaki zararlanğan ev , körüne ki, doğrudan-doğru uruldı, qatları kesildi. Aynı vaziyet Vıgovskiydeki evde, anda da raketa tüşti... Şimdi qurtaruv ameliyatı devam ete, bir çoq yaralanğan, 20-den ziyade, tibbiy yardım kösterile. Umumen 20-den ziyade ev, eki bala bağçası, mektep zarar kördi. Bu Lvivge yapılğan eñ büyük ücümlernden biridir. İnsanlarnıñ çoqusı sığınaqqa ketkwni pek yahşı oldı", — dep ayttı Sadovıy, Azatlıq Radiosınıñ mühbiriniñ sualine cevap bererek.
Yıqıntılar altında qaç insan bulunğanı belli degil.
Gece Rusiye arbiyleri, Ava quvetleriniñ malümatına köre, Ukrayinağa ballistik raketalarnı ve dronlarnı uçurdı. Lvivdeki aqibetlerden ğayrı, Kıyivde bir ölü ve eki yaralanğan kişi aqqında haber etile, Krıvıy Riğ civarındaki şahsiy evlerge urulğanı belli, neticede çoq balalı qoranta azaları elâk oldı, Poltava vilâyetinde bir insan elâk oldı.
Bir kün evelsi aqşam prezident Volodımır Zelenskıy, Rusiye Ukrayina territoriyasınaücüm ete bile, dep tenbiledi.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.