Rusiye Federatsiyasınıñ uquq qoruyıcıları tarafından "Hizb ut-Tahrir" teşkilâtı ile bağları olğanında qabaatlanğan "qırımlı musulmanlar dördünci Canköy gruppasınıñ" mabüsi Emir Kurtnezirovnı Rostov-na-Donudaki SİZO-1-ge alıp kettiler. Bu aqta ömür arqadaşı Safiye Yakubova "Qırım birdemligi" cemaat birleşmesine tarif etti.
Dekabrniñ 16-nda o, Rostov SİZOsına muracaat yollap, Kurtnezirov anda dekabrniñ 11-nden başlap buluna degen cevap aldı.
Yakubova haber etkenine köre, Kurtnezirov qorantasınen şimdilik bağlanmay. Büyük ihtimalnen, bu eki afta karantin kamerasında buluna. Qırımlınıñ apayı karantinden çıqqan soñ erkek ailesine cevap berip olur, dep ümüt ete.
Hatırlatamız, davanıñ diger mabüsleri – Abibulla Smedlâyev, Emir Kurtnezirov, Rustem Mustafayev, Mirzali Tajibayev ve Bahtriya Ablayev – noyabrniñ soñnunda Aqmescitteki SİZO-2-den Rostov-na-Donuğa etap etildi. Soy-sopları olarğa bir şeyler yollamağa tırışqanda etap aqqında haber aldı.
Fevralniñ 5-nde saba işğal etilgen Qırımnıñ Canköy ve İslâm Terek rayonlarında tintüvler keçirildi, beş qırımtatarınıñ tutulğanı belli oldı. Apiske alınğanlar arasında – imam Remzi Kurtnezirovnıñ oğlu Emir, çağına yetmegen dört balanıñ babası Abibulla Smetlâyev, santehnik Rustem Mustafayev, Mırzaali Tacıbayev ve Bahtiyar Ablayev.
FSB hadimleri tahqiqat tedbirlerini keçirmek içün olarnı Aqmescitke alıp ketti. Rusiye qurğan Aqmescit Kiyev rayon mahkemesi olarnı apiske aldı. Episi Rusiyede yasaqlanğan, amma bir çoq memlekette faaliyetine izin berilgen "Hizb ut-Tahrir" islâm siyasiy firqasınıñ faaliyetinde iştirak etkeninde qabaatlana.