Ukrayına Yuqarı Radasınıñ insan aqları vekâletlisi Dmıtro Lubinets Rusiye SİZOsınıñ hadimleri tarafından «ekinci Canköy» Hizb ut-Tahrir gruppasınıñ mabüsi Ekrem Kroşnıñ zorbalıqqa oğratıluvını acele toqtatmağa talap ete.
«Siyasiy mabüs Ekrem Kroşqa qarşı qılınuvnı acele toqtatmağa talap etem!… Qanunsız alda apiske alınğan Ukrayına vatandaşlarına qarşı işkenceler cinayet ola ve acele toqtamalı!», – dep qayd etti o, Telegram kanalında.
Kreşniñ advokatqa bildirgenine köre, zorbalıq sebepsiz qullanıldı ve bu iyünniñ 16-nda mabüslerniñ izolâtornı zapt etkeninden ola bile, dep tahmin etti. Kütleviy haber vastaları bildirgenine köre, SİZOda tintüvler keçirildi ve hadim ve mabüsler sorğuğa çekildi.
2023 senesi yanvarniñ 24-nde saba Canköy rayonında Rusiye uquq qoruyıcıları qırımtatarlarnıñ evlerinde tintüv keçirdi: Nemse Canköy (Blijnegorodskoye) köyünde Ekrem Kroş, Timofeyevka köyünde Ayder Asanov ve Refat Seydametov, Çoqraqlı Şeyh Eli köyünde (Dneprovka) Osman Abdurazakov, Canköyde Leman Zekiryayev ve Halil Mambetovnıñ evini.
Ekrem Kroşnıñ ömür arqadaşı Amideniñ «Qırım birdemligi» cemaat teşkilâtına bildirgenine köre, Qırım şimalinde tutulğan qırımtatarlar «terrorizmde» qabaatlana bile. Qırımlı musulmanlarğa mustaqil advokatlar alınmay, dep haber etilgen edi.
Qırımnıñ Rusiye yolbaşçısı Sergey Aksenov yanvarniñ 24-nde saba qırımtatarlarnıñ evlerinde keçirilgen tintüvlerni izaatladı. Onıñ aytqanına köre, uquq qoruyıcılar «Ukrayına ile alâqaları» bar olğanında qabaatlanğan altı vatandaşnı tuttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.