Rusiye FSBsi tarafından silâ ve patlayıcı maddelerni saqlağanında qabaatlanıp, Qırımda apiske alınğan qırımtatar faali Edem Bekirovnı Aqmescitniñ 6-ncı şeer mahkemesine 30 daqqa devam etken tibbiy tetqiqke alıp kettiler.
Bu aqta Bekirovnıñ advokatı İslâm Velilâyev Qırım.Aqiqat mühbirine bildirdi.
«Kardiogramma yapıldı, Aqmescitteki 6-ncı şeer hastahanesiniñ kardiologik bölüginde 30 daqqa tutıp, SİZOnıñ tibbiy bölügine alıp kettiler», – dep tarif etti advokat.
Velilâyevniñ fikirince, tahqiqat izolâtorınıñ memuriyeti iyünniñ 11-nde Avropa insan aqları mahkemesiniñ Rusiye akimiyetinden Bekirovnı acele hastahanege yatqızmasını talap etken qararına cevap berdi.
«Ekimlerniñ mesleatı olğandır, onıñ neticesinde sağlam olğanını ve ileride de SİZOnıñ tibbiy bölüginde nezaret altında tutula bile, dep aytacaqlar. Avropa insan aqları mahkemesine cevap bermek içün formal tibbiy hulâsa kerektir», – dep tüşüne advokat.
Velilâyevniñ aytqanına köre, Bekirovnıñ diger advokatı Aleksey Ladin onı iyünniñ 20-nde SİZOda ziyaret etmek niyetinde.
SEE ALSO: «O, qorqunç şaraitlerde buluna»Daa evel Avropa insan aqları mahkemesiniñ qararına baqmadan, Qırımdaki Rusiye Federal telükesizlik hızmeti idaresiniñ üyken tahqiqatçısı İvan Romanets işğal etilgen Qırımnıñ Aqmescit SİZOsında tutulğan qırımtatar faali Edem Bekirovnı hastahanege yatqızmağa razı olmağanını bildirgen edi.
İyünniñ 11-nde Avropa insan aqları mahkemesi Qırımda silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ davası boyunca qarar çıqardı. Mahkeme onıñ hastahanege acele yatqızılmasını talap etti.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.