Dünya sağlıq teşkilâtınıñ baş müdiri Tedros Adhanom Gebreisus koronavirus ile esas küreş daa ögde, dep tenbiley, dep haber ete Azatlıq Radiosı.
«İnanıñız, eñ qıyını daa ögde. Bu faciağa mania ola bilemiz. Bu virus ne olğanını añlamağan çoq insan bar», – dep ayttı DST yolbaşçısı aprelniñ 20-nde Jenevadaki matbuat konferentsiyasında.
Onıñ bildirgenine köre, DST tenbilerine baqmadan, ilerilegen memleketler içün koronavirus ketişatı beklenmegen oldı.
Dünya sağlıq teşkilâtı, sağlıq sistemaları zayıf olğan memleketler pandemiyağa nasıl dayanacaq, dep qasevetlengenini bildirgen edi.
DST yolbaşçısı mezkür beyanatını bazı memleketler pandemiyanen bağlı ilân etilgen karantinden çıqıp başlağanda aydınlattı.
Your browser doesn’t support HTML5
Koronavirus: yalan ve propaganda | StopFake News (video)
Johns Hopkins universitetiniñ malümatına köre, dünyada tahminen 2,5 mln koronavirus hastası qayd etildi, tahimnen 170 biñ kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.