Dünyada azatlıqtan uzun müddetke marum etilgen er yigirminci jurnalist Qırımdan ola, dep bildire "Qırım esnası" aq qorçalayıcı teşkilâtı.
Teşkilât qayd etkenine köre, böyle hulâsalar Jurnalistlerni qoruv komiteti toplağan malümatqa ve öz közetüvlerine esaslanıp çıqarıldı. Haber etilgenine köre, aq qorçalayıcılar bu raqamlarnı yañı BM söz serbestligi mahsus maruzacısına muracaat azırlamaq içün qullanıp, oña apiske oğrağan jurnalistlerniñ taqdirine çoqça diqqat ayırmağa tevsiye etti.
Aq qorçalayıcılar qayd etkenine köre, Rusiye akimiyetiniñ resmiy malümatına zıt kelgen malümatnıñ qabaat olaraq sayıluvı mahkeme praktikasını kenişletti, bu da "apiske oğrağan jurnalistlerniñ sayısını arttıracaq".
Bundan ğayrı, "Qırım esnası" muracaatında Rusiye apishanelerinde Qırımlı jurnalistlerge qarşı basqı misallerini aydınlattı, teşkilâtnıñ malümatına köre, jurnalistler "nizam taqipleri, sert munasebet, diniy aqlarnıñ bozuluvına oğray ve tibbiy yardımnıñ temel standartları berilmegeninen rastkele".
"Ükümlerden soñ cemiyet, daa doğrusı halqara qurulışlar fikirleri içün zarar körgen taqip qurbanlarınıñ taqdirine diqqat ayırmay. Meselâ, BM söz serbestligi meseleleri mahsus maruzacısı "Reportörı bez granits"" teşkilâtınıñ Qırımlı jurnalist İrına Danılovıçqa qarşı çekiştirüv vaziyetine dair malümatını körmemezlikke urdı. Biz tevsiyeler azırlap, BM mahsus maruzacısı apisteki jurnalistlerge daa çoq diqqat ayırmalı, hususan apishanelerde aqları bozulğanına cevap bermeli, dep ayttıq", – dep aytıla "Qırım esnası" teşkilâtınıñ haberinde.
Tevsiyeler BM mahsus maruzacısınıñ 2026-2029 yılları mandatnıñ strategik vazifelerinene bağlı. Aq qorçalayıcılar teklif çerçivesinde "zorlap hırsızlav, qanunsız mahkeme taqibi ve apiste jurnalistlerge qarşı sert munasebetnen bağlı Halqara şahıs cedvelini tizüv aqqında dialog başlatmağa" çağırdı.