Nyü-Yorkta BMT Baş Assambleyasınıñ 11-ci sessiyasi tamamlandı. Bazarertesi künü, oktâbrniñ 10-nda, ve çarşenbem künü, oktâbrniñ 12-nde teşkilâtnıñ azası olğan devletler "Ukrayinanıñ topraq bütünligi: BMT Nizamnamesiniñ printsipleriniñ qorunması" adlı qarar leyhasını baqıp çıqtı, dep yaza "Amerika Sesi"niñ ukrayin hızmeti.
Vesiqa Ukrayinanıñ topraq bütünligine sadıqlıqnı tasdıqlay ve Rusiyeden Donetsk, Lugansk, Zaporijjâ ve Herson vilâtleriniñ muvaqqat işğal olunğan topraqlarınıñ ilhaqı ile bağlı qararnı lâğu etmekni talap ete.
Qararğa ekseriyet rey berdi. 143 memleket qoltuttı, 5 qarşı çıqtı ve 35 bitaraf qaldı.
Rusiye ve Belarustan ğayrı daa Suriye, KNDR ve Nikaragua qararğa qarşı çıqtı.
Bitaraf qalğan memleketler arasında Çin, Ermenistan, Kuba, Eritreya, Abeşistan, Hindistan, Qazahistan, Özbekistan ve digerleri. Qararnıñ Baş Assambleyası tarafından tasdıqlanması içün reylerniñ eñ azı üçte ekisi kerek.
Bu qarar azğardan daa çoq destek qazandı.
Nyü-York, 2022 senesi oktâbrniñ 12-si
Rey berüvden evel ABD-niñ BMT-daki daimiy temsilcisi Linda Tomas-Grinfild BMT-nıñ "iç bir memleketniñ başqasınıñ toprağını küç ile zapt etmesine izin berilmecegi" ğayesi üzerinde qurulğanını qayd etti. Amerikalı diplomat memleketlerni qarağan qoltutmağa çağırdı.
Bu BMT qomşunıñ toprağınıñ küçnen zapt etilmesine imkân bermeycek. Qarşı turacaqmızLinda Tomas-Grinfild
"Sussañız iç bir vaqıt sulh elde etilmez. Sulhqa irişmek içün yekâne yol bu tecavuznı toqtatmaq, mesüliyet talap etmek, beraberlikte takbih etmek, buña köz yummaycağımıznı köstermek. Şunıñ içün, keliñiz bugün bunı açıq-aydın bildireyik: Birleşken Milletler Teşkilâtı qanunsız ilhaqqa köz yummaycaq. Biz bunı iç bir vaqıt tanımamız. Bu BMT qomşunıñ toprağınıñ küçnen zapt etilmesine imkân bermeycek. Qarşı turacaqmız. BMT kendi nizamnamesiniñ yoq etilmesine yol bermeycek. Biz onı mudafaa etecekmiz", - dedi o.
"Teşkilâtnıñ baş kâtibi aytqanı kibi, zemaneviy dünyamızda Rusiyeniñ areketlerine yer yoqtır. Bugın Rusiye Ukrayinağa qarşı istilâ etti. Yarın ise bu sıñırları bozulacaq başqa bir millet ola bilir. Nevbetet ola bilirsiñiz. Bu palatadan ne beklediñiz?", - dep qoştı o.
ABD-niñ BMT-daki daimiy temsilcisi Linda Tomas-Grinfild
Ukrayinanıñ BMT-daki daimiy temsilcisi Sergiy Kıslıtsâ keçenlerde memlektelerni qrarğa qoltutmağa çağırdı. Akis aldı, onıñ sözlerine köre, "dünya öyle bir vaziyetke tüşecek ki, bütün meselelerni özek silâsı ve ordunıñ büyükligi al eter".
Rusiyeniñ qorqqan yekâne şey BMT Nizamnamesiniñ mudafaasında bizim külçlü birligimizSergiy Kıslıtsâ
"Ailem ateş astında qalğan yaşayış binasında edi, olar yarıq olmağanı içün bomba sığınağı ketip olamadılar. Rusiye artıq ailemniñ bazı azalarını öldürdi ve biz bu zalımlıqnıñ soñunı körmeymiz. Rusiyeniñ qorqqan yekâne şey BMT Nizamnamesiniñ mudafaasında bizim külçlü birligimiz. Bunı kendimiz içün yapmalımız. Akis alda, Rusiyeniñ kelecekke baqışı ğalip çıqsa, çoqumız soñ derecede zayıf ve imayesiz vaziyette qalacaqmız. Bu yalñız özek silâsınıñ, ordu büyükliginiñ ve arbiy gemi ve uçaqlarnıñ sayısınıñ emiyeti olğan bir kelecektir. Böyle dünyada kendini telükesiz duyacaq çoqmı bar? Kendi balalarıñıznı kelecekten marum qaldıra bilecegiñiz çoqmı?", - dedi Kıslıtsâ.
Ukrayinanıñ BMT-daki daimiy temsilcisi Sergiy Kıslıtsâ
Öz nevbetinde, Rusiyeniñ BMT-daki daimiy temsilcisi Vasiliy Nebenzâ Rusiye ordusınıñ Ukrayina topraqlarına arbiy istilâsına baqmadan, sahte referendumnıñ işğal etilgen bölgelerdeki Ukrayina vatandaşlarınıñ Rusiyege qoşulmağa istegini köstergeninde israr etti.
BMT-daki Rusiyeniñ daimiy temsilcisi Vasiliy Nebenzâ (ortada)
Evel, oktâbrniñ 11-nde ABD-niñ BMT-daki daimiy temsilcisi Linda Tomas-Grinfild Nyü-Yorkta BMT-nıñ matbut merkezinde brifing vaqtında BMT-nıñ nizamnamesiniñ qorunmasınıñ müim olğanını, Rusiye ise Ukrayinadaki areketleri içün mesüliyetten qaçınmaq maqsadınen veto aqqını qullanğanını qayd etti.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.