Lvivde mayısnıñ 1-ne keçer gecesi kimligi belli olmağan insanlar İçkeriya Çeçen Cumhuriyetiniñ birinci prezidenti, çeçen halqınıñ milliy qaramanı Cohar Dudayevniñ hatıra tahtasını hırsızladı, dep bildirdi Lviv şeer şurasınıñ icra komitet işleri idarecisi Yevğen Boyko.
"Bugün gece saat 01:05-te vandallıq qayd etildi. Cinayetçiler Dudayevniñ tahtasını hırsızladı. Poliske haber berildi. Tahtanı ğayrıdan tiklermiz", – dep qayd etti Boyko.
Polis vaziyetni şimdilik izaatlamadı.
Hatıra tahtası bu yıl aprelniñ 21-nde Dudayevniñ ölüm kününde açıldı. Onı Lvivniñ merkezinde Cohar Dudayev soqağınıñ başındaki binada tiklediler.
Cohar Dudayev hatıra tahtasınıñ açılışı, Lviv, 2026 senesi aprelniñ 21-i
Cohar Dudayev – çeçen arbiyi ve siyasiy erbap, 1990-larda Rusiyeden mustaqil olmaq içün küreşken İçkeriya Çeçen Cumhuriyetiniñ birinci prezidentidir. Sovetler Birligi dağılmazdan evel Sovet ordusı aviatsiyasınıñ general-mayorı edi. 1996 senesi aprelniñ 21-nde Su-25 Rusiye uçağından atılğan raketanen öldürildi. O sene Lvivdeki Lermontov soqağına Cohar Dudayev adı berildi.
İstanbul, Ankara, Ammanda Dudayev soqaqları bar. Onıñ adı Varşavadaki meydanğa, Vilnüsteki skverge, Rigadaki avenüğa ve diger obyektlerge berilgen edi.