İşğal etilgen Qırımda mayısnıñ 15-ne keçer gecesi dronlarnıñ uçqanı köründi ve küçlü patlavlar oldı, Aqyarda ava telükesi ilân etildi.
"Krımskiy veter" telegram kanalı abunecileriniñ malümatına esaslanıp, Kezlevde ve Saqta uçucısızlar uçtı, bir saat sesli patlavlar oldı, Rusiye ava mudafaası çalıştı.
Bağçasaray rayonınıñ Alma Tamaq köyünde, "Kaça" ava limanında ve Aqyardaki Felenk burnunda dronlar uçtı, olarğa ateş açıldı. "Krımskiy veter" haber etkenine köre, saat 04:28-de Saq rayonında daa bir küçlü patlav oldı.
Aqyarnıñ Rusiye yolbaşçısı Mihail Razvojayev saat 04:12-de Telegram kanalında şeerde bir saattan soñ bitken ava telükesi aqqında ilân etti. Deñiz yolcu naqliyatı areketini toqtattı.
Ukrayina ve Rusiye arbiyleri Qırımda gece olğanlarnı izaatlamadılar.
Qırım.Aqiqat muarririyeti bu malümatnı cenk vaziyetinde mustaqil şekilde teşkerip olamay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.