Qırım yarımadası yanvarniñ 12-nde aqşam uçucısızlarnıñ ücümine oğradı. Bu aqta Qırım.Aqiqatnıñ Qırım mühbirleri ve yerli saifeler bildire.
"Krımskiy veter" Telegram kanalı haber etkenine köre, dronlar Kefe, Keriç, Canköydeki obyektlerge ücüm etti, anda patlav ve atışlar eşitilgen edi. Qırım.Aqiqat menbasınıñ haberine köre, Kefede bir qaç patlav ve top atışı eşitildi.
Keriçteki menbanıñ malümatına köre, atış ve patlavlar şeerniñ çeşit rayonlarında eşitildi, Keriç köprü qapatılğan edi.
Rusiye Mudafaa nazirligi dron ücümini tasdıqladı. Aynı vaqıtta, Rusiye arbiy müessisesi "saat 16-dan 20-ge qadar ava mudafaasınıñ nevbetçi vastaları 56 ukrayin uçucısız uçaq çeşitli cihazını yoq etti", 21-i Qırımda ve 8-i Azaq deñizinde.
Qırım.Aqiqat muarririyeti cenk vaziyetinde bu malümatnı teşkerip olamay.
Ukrayina arbiyleri bi malümat daa bildirmedi.
2022 senesinden berli Qırım yarımadası aman-aman er kün uçucısız ve raketalarnıñ ücümlerine oğray, çoqusı allarda bu malümat tasdıqlansa bile, Rusiye Mudafaa nazirligi ya da Rusiye akimiyeti arbiy obyektlerge darbe endirilgenini inkâr ete.