Cumaaqşamı künü, aprelniñ 16-nda, Donbasta tutulğan şahıslarnı deñişim kerçekleştirile. Bu aqta Ukraina prezidentiniñ ofisi ve Ukraina ombudsmeni Lüdmila Denisova bildireler.
Berilgen malümatqa köre, deñişim Ğorlivka civarındaki «Mayorsk» keçiş noqtası rayonında keçe, 19 Ukraina vatandaşı qayta.
«Tutulğan şahıslarnı daa bir qarşılıqlı deñişim etapı başlandı – Ukraina vaqtınca işğal etilgen topraqlarda apiste tutulğan 19 vatandaşını qaytara. Devlette olğan karantin sıñırlavları sebebinden qaytqan ukrainalılar mecburiy observatsiyağa yol alacaq», – dep aytıla Prezident ofisiniñ haberinde.
Qayd etilgenine köre, qarşılıqlı deñişim «er kesni» formatı çerçivesinde keçe. Cedvelde kimler bar – aytılmay.
Denisovanıñ aytqanına köre, azat etilgenler arasında Viktor Şaydov bar. O, Ukraina Silâlı quvetleriniñ arbiyidir. Esir alınıp, 2019 senesinden berli Donetsk vilâyetiniñ vaqtınca işğal etilgen toprağında qanunsız tutuldı.
Aprelniñ 15-nde Ukraina prezidentiniñ ofisi, tutulğan şahıslarnı deñişim eñ yaqın vaqıtta olacaq, soñki cedvel ve logistika muzakereleri keçirile, dep bildirdi.
Daa evel deñişim Pashağa yaqın, aprelniñ 19-ı, arfesinde olacaq, dep haber etilgen edi.
Ukraina ve «LDNR» gruppirovkaları arasında tutulğanlarnı soñki deñişim 2019 senesi dekabrniñ 29-nda oldı. Donetsk ve Lugansk vilâyetleriniñ işğal altındaki rayonlarından 81 ukrainalı azat etildi: 76-sı Ukraina ükümetiniñ kontroli altındaki topraqqa qayttı, daa beşi Rusiye gibrid quvetleri kontrol etken yerlerde qalmağa istedi. 76-dan 12-si endi sabıq cenk esirleri ola, 64-ü – vatandaştır. Ekinci tarafqa 124 insan teslim etildi.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.