Rusiye arbiyleri martnıñ 24-nde saba Dniproda çoq qatlı evge darbe endirdi, üç kişi yaralandı, dep haber etti vilâyetniñ arbiy memuriyet yolbaşçısı Oleksandr Ganja. O, ücüm nenen kerçekleşti aytmadı.
"Çoq qatlı binada yanğın çıqtı. Şeerge qarşı ücüm devam ete. Telükesiz yerde qalıñız", – dep yazdı memur saat 10:43-te. O, 14 qatlı evde "divar, balkon, pencere, tehnik qat" zarar kördi, dep qoştı.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.