Rusiyeniñ Dnipro şeerine qarşı ücümi sebebinden 13 insan elâk oldı, dep bildirdi vilâyetniñ arbiy memuriyet yolbaşçısı Oleksandr Ganja.
Onıñ malümatına köre, daa beş insan yaralandı. Ganja bundan evel Rusiye naqliyat infrastruktura obyektine darbe endirdi dep bildirdi, amma tafsilâtlar bermedi.
Dnipro şeer yolbaşçısı Boris Filatovnıñ haber etkenine köre, Rusiye dronı vatandaş elektrik trenine ücüm etti – "çoq insan elâk oldı, yaralanğanlar çoq".
"Ukrzaliznıtsâ" bildirgenine köre, Rusiye reaktiv uçucısızı Dniproda demiryol vokzalına darbe endirdi – darbe platformalardan birine yapıldı, o vaqıt anda № 866 Dnipro-Zaporijjâ treni tura edi.
"İlân etilgen yüksek telükege baqmadan, platformada insanlar bar edi. Elâk olğanlar ve yaralanğanlar bar", – dep tasdıqladı "Ukrzaliznıtsâ".
Rusiye quvetçileri demiryol infrastrukturasına çoq darbe endirdi, lokomotiv ve vagon depoları, vokzal ve stantsiyalar, trenlerge ücüm etilgen edi.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.