«Devlet hainliginen» qabaatlanğan Qırım sakin İvan Yatskin Aqmescit SİZO-sında ruhiy basqı altında, dep haber etti Qırım.Aqiqatqa advokat Nikolay Polozov.
«Mayıs tatilleri arfesinde SİZO-ğa dava iştirakçilerinden biri, İİN hadimi keldi. İvan Grigoriyeviçni operativ bölükke çağırdılar. Bundan soñ onen beraber bir kamerada oturğan kişiler em onı, em qorantasını tehdit etip başladılar. Balalarınen evini yaqaralar, onı, qorantasını ve advokatını öldürirler, dep ayttılar. İvan Yatskinniñ tek bir advokatı bar ve bu da men, yani söz menim aqqında kete edi», – aytıp berdi Polozov.
Bu sebepten advokat İvan Yatskin ve ailesine qarşı telükesizlik tedbirleri qullanılması içün ariza bergen.
«Yuqarıda añılğan faktlar teşkerilmek kerek ve SİZO-da Yatskinni davanıñ iştirakçisi ziyaret ettimi, yoqmı ve kamerada onen beraber oturğanlar oña basqı ettimi, yoqmı ögrenilmeli», – dedi Polozov.
Onıñ malümatına köre, Yatskinni endi diger dört kişilik kamerağa avuştırğanlar, anda o bir insannen buluna.
Bundan ğayrı, Polozov, 2021 senesi mayısnıñ 12-nde İvan Yatskinniñ tevqif müddetiniñ uzatılmasına qarşı berilgen istinaf şikâyeti red etilgenini bildirdi. Böylece o, 2021 senesi iyülniñ 1-nece tevqifli qalacaq.
Жизнь семьи крымчанина Ивана Яцкина после его ареста (фотогалерея)
Yanvarniñ 28-nde Qırımnıñ Curçı rayonındaki Toğaylı (Kormovoye) köyünde Yatskinniñ ömür arqadaşı Gülnara Kadırovanıñ evinde Rusiye quvetçileri tintüv keçirdi.
Qırımnıñ Curçı rayonınıñ Aybar (Voykovo) köyüniñ sakini İvan Yatskin 2019 yılda oktâbr 16-sında tutuldı. Bu dekabr ayında belli oldı.
Polozov, Yatskin apiske alınğan soñ Qırımdan Moskvağa çıqarıldı, dep bildirgen edi. Onıñ aytqanına köre, Rusiye quvetçileri qırımlığa «büyük maneviy basqı» yaptı.
Qırım.Aqiqatnıñ Ukraina telükesizlik hızmetine yollağan muracaat cevabında İvan Yatskin UTH ile işbirligi yapmadı, dep aytıla.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.