Qırım SİZOsında tutulğan Qırımdaki «Hizb ut-Tahrir davalarından» biriniñ mabüsi Ayder Cepparovnıñ ast çengesinde şişik çıqtı, dep bildire Ukraina Yuqarı Radasınıñ insan aqları vekâletlisi Lüdmila Denisova.
«Şişik ast çengesinde sağ sekizinci ast tişi altında çıqtı, qırtlaqqa kete. Ağzını açıp olamay ve yutamay. Tibbiy yardım kösterilmegeni içün Ukraina vatandaşı toqtamağan tiş ve baş ağrısından şikâyet ete», – dep yazdı Denisova Facebookta.
O, Rusiye İnsan aqları vekâletlisi Tatyana Moskalkovağa kene muracaat etip, tolu tibbiy tedqiq keçirilmesi ve kerekli tibbiy yardım kösterilmesi içün yardım etmesini talap etti.
Moskalkovanıñ Denisovanıñ muracaatına açıq şekilde daa seslenmedi, SİZO reberligi Ayder Cepparovnıñ sağlıq vaziyetinen bağlı izaat bermey.
Bir kün ögüne Denisova, Aqmescit SİZOsında Aqmescitteki ekinci «Hizb ut-Tahrir davasınıñ» mabüsi Tofik Abdulgaziyevniñ qanı zeerlendi, dep bildirdi. Ukraina ombudsmeni, Rusiye zenaatdaşı Tatyana Moskalkovanı Yaltadaki «Hizb ut-Tahrir davası» boyunca mahküm etilgen Arsen Cepparovğa tibbiy yardım kösterilmesi içün acele tedbir almasına çağırdı.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi. Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.