İşğal etilgen Qırımda ve Rusiyede apiste tutulğan ukrainalılarğa kösterilgen advokat yardımınıñ ödev meselesi çezilmedi. 89 qırımtatarı böyle yardımğa muhtac, dep qayd etti Ukraina Yuqarı Radasınıñ insan aqları vekâletlisi Lüdmila Denisova.
Ombudsmenniñ Facebook saifesinde yazğanına köre, sentâbrniñ 17-nde Yuqarı Radanıñ insan aqları, işğalden qurtaruv ve vaqtınca işğal etilgen Donetsk, Lugansk vilâyetleri ve Qırım Muhtar Cumhuriyeti, Aqyarnıñ reintegratsiyası, milliy azlıqlar ve milletlerara munasebetler meseleleri komitetiniñ toplaşuvında ukrainalı mabüslerge bedava kösterilecek uquqiy yardımğa dair qanun leyhası muzakere etildi.
«89 qırımtatarı böyle imayege muhtac. Amma, ne yazıq ki, işğal etilgen Qırımda apiske alınğan Ukraina vatandaşlarını qorçalaycaq advokat emegini ödev teminlevi al etilmedi. Tuvğanları bu yardımnı ödemek içün para qıdırmağa mecbur», – dep yazdı Denisova.
Ombudsmenniñ qayd etkenine köre, o, qanun leyhasına qoltuttı, amma «onı mükemmelleştirmek kerek».
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi.
Yuqarı Radanıñ insan aqları vekâletlisi Lüdmila Denisovanıñ malümatına köre, Rusiyede 113 Ukraina vatandaşı apiste tutula, 89 – qırımtatarıdır.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.