Qırımda saba tintüvleri vaqtında yaqalanğan Qurman sakini Memet Aşurov Aqmescitteki FSB binasından boşatılğan. Bunı "Qırım birdemligi" cemaat birleşmesi haber ete.
Daa evel FSB advkoat Edem Semedlâyevniñ onen körüşmesine izin bermegen edi.
"Saba saat 9-dan başlap FSB binasında edim, anda Memet Aşurovnı qıdırıp defalarca FSB nevbetçisine telefon ettim. Defalaraca yapqan itirazlarımdan soñ bir adam çıqtı, kendisini adliyeci mesleatçı kibi tanıttı ve Memet Aşurovnıñ şaat olaraq sorğuğa çekilgenini ve bundan soñ operativciler onen bir sıra tahqiqiy areketler keçirgenini bildirdi. FSB onıñ tibbiy ve uquqiy yardımğa ihtiyacı olmağanını bildirdi. Onıñ yardımğa ihtiyacı olıp olmaması ile bağlı itirazlarıma, şikâyet ete bilesiñiz dediler. Başqa malümat bermediler. Saba saat 8-den adam andadır, ne vaziyette olğanı belli degil", - dedi Semedlâyev.
Yaqın vaqıtta advokat Rusiye prokuraturası ve Federal telükesizlik hızmetine şikâyetlerle berecek.
Martnıñ 9-nda saba RF quvetçileri Qurman qasabasında qırımlı Memet Aşurovnıñ evinde tintüv keçirgen ve bundan soñ onı yaqalap, Aqmescitteki FSB idaresine alıp ketken edi.
Martnıñ 6-nda Sudaqta Rusiye quvetçileri qırımtatar Edem Murtazayevniñ evinde tintüv keçirgen ediler, bundan soñ o ömür arqadaşı ile beraber yaqalanıp, Aqmescitteki Rusiye Federal telükesizlik hızmetiniñ bölügine ketirilgen edi. Qırımtatar Milliy Meclisi reisi Refat Çubarov Murtazayev işğal etilgen Qırımda Bazarçıq qasabası civarındaki "Aqmescit" stantsiyasına 12 kilometr uzaqlıqtaki demiryolnıñ bir qısmını patlatuv ve zarar ketirüv şübesi ile yaqalanğanını bildirdi.
Daa evel Rusiye FSBsi Bazarçıq (Poçtovoye) köyünde demiryolğa ketirilgen zarar sebebinden Bağçasaray rayonınıñ Priyatnoye Svidaniye köyünde Cemilovlarailesiniñ evini tintken edi.
Fevralniñ 23-nde aqşam Bağçasaray rayonında kimligi belli olmağan insanlar demiryolğa zarar ketirdi. Neticede trenlerniñ areketi toqtatıldı.
Qırımda Rusiye uquq qoruyıcılarınen işbirligi yapqan Rusiye tarafdarı bloger Aleksandr Talipov adiseni «diversiya» dep adlandırdı. Onıñ malümatına köre, «patlav olmadı, qaynaqnen çalışıp, bir qısmını kesip alğanlar». O, «şübheliler belli, operativ tedbirler keçirile», dep ayttı. Rusiye uquq qoruyıcıları adiseniñ sebepleri aqqında bir malümat bermedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.