ABD prezidenti Donald Trump eñ yaqın afta COVID-19 pandemiyası vaqtında hususan ölüm sayısına köre eñ zor ola bile, dep tenbiledi.
Trump, koronavirus qırğınlığı sebebinden kirsetilgen sıñırlav tedbirlerini memlekette aprelniñ 30-na qadar uzattı. Aprelniñ 5-nde o, memleket «tezden» işke qaytıp olur degen ümütini bildirdi, dep haber ete Azatlıq Radiosı.
«İşke qaytmamız kerek. Kene açılmamız kerek. Bunıñ aylarnen devam etmesini istemeymiz», – dedi Trump.
Your browser doesn’t support HTML5
Maska taqqan insanlar ne içün o qadar çoq oldı? Balalarğa añlatamız (video)
Amerika Birleşken Devletlerinde yañı hasta sayısı artmağa devam ete. Keçken künü tahminen 35 000 yañı hasta ve 1300 ölüm qayd etildi.
Memlekette hastalarnıñ sayısı 312 000-ni aştı, 8500 insandan çoq vefat etti, bu bütün memleketler arasında eñ büyük raqam.
Tahminen 113 000 hasta ve ölümlerniñ aman-aman yarısı – New York ştatında.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.