Aqyarda avgustnıñ 3-nde saba daa 171 yañı COVID-19 hastası qayd etildi, 32 yaşından 94 yaşına qadar 7 insan koronavirus yuqunçından vefat etti, dep bildire Aqyarnıñ Rusiye ükümeti.
«Umumen Aqyarda 21 297 insan yañı koronavirus yuqunçına oğradı. 18 502 kişi tüzeldi, 869 insan vefat etti, 709 kişi közetile – bu insanlar hastalarnen alâqada oldı, amma COVID-19 diagnozı tasdıqlanmadı», – dep aytıla haberde.
Avgustnıñ 2-nde saba 166 koronavirus hastası ve 5 vefat aqqında haber etildi.
Aqyarnıñ Rusiye ükümetiniñ yolbaşçısı Mihail Razvojayev şeerde koronavirus aşısını yaptırmağa istegenlerniñ sayısı eksildi, dep qayd etti. Onıñ bildirgenine köre, Aqyar hastahaneleri COVID-19 hastaları içün qoşma tibbiy oksigen ketirilüvini ödep yetiştirmey.
Aqyarda COVID-19 hastalarınıñ sayısı artqanı içün yañı koronavirus sıñırlavları kirsetildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.