Rusiye tarafından işğal etilgen Qırımda Rusiye İç işler nazirliginiñ Qırım bölüginiñ "E" Merkeziniñ vekilleri siyasiy davalarda qabaatlanğan mabüslerini qorçalağan advokatlarnıñ ofisinde tintüv keçirdiler. Olarnıñ Aqmescitteki ofisinden vesiqalar tutıp alındı, advokatlarnıñ özü ise terroristik faaliyette şübheli ilân etildi. Ne içün quvetçiler keldi ve aqibetleri ne ola bile, Qırım.Aqiqatnıñ materialında tarif etemiz.
Qırımnıñ işğal altındaki kerçeklerinde yerli aq qorçalayıcılar defalarca Rusiye quvetçileriniñ basqısına rastkelgen edi. On yıl devamında Qırımlılarnı — siyasiy davalarnıñ mabüslerini — qorçalağan advokatlar taqımı ep sorğuğa çekildi, para cezası berildi ve memuriy apiske alındı.
Rusiye Ukrayinağa keñ kölemli basuvnı başlağan soñ, memuriy basqı seviyesi bayağı arttı. Bazıları adliyecilik faaliyetinen oğraşma imkânından marum qaldı. Çalışmağa devam etkenker ise, akimiyet organlarınıñ misli olmağan areketlerine oğraylar.
Dört saat devamında içeri kirsetmediler ve çıqarmadılar
"E" merkeziniñ vekilleri Rusiye mahsus hızmetiniñ silâlı taqımlarınen beraber Rusiye Federatsiyası nezaretindeki Qırım advokatlar merkeziy kollegiyasınıñ ofisine keldi, anda advokatlar Edem Semedlâyev, Emil Kurbedinov, adliyeciler Nazim Şeyhmambetov, Elvina Semedlâyeva, Rustem Kâmilev ve Lilâ Gemeci çalışalar.
Qırımlı advokatlar Edem Semedlâyev, Nazim Şeyhmambetov, Emil Kurbedinov ve Lilâ Gemeci
Şaatlarnıñ aytqanına köre, ofiske kelgen erkekler başta üç kişi edi. Olar sport urbalı ve şapkalı, omuzlarında çantaları bar eken. Özüni "Krımenergo" hadimleri olaraq tanıtqanlar. Soñra ofiske polis, "E" Merkezi, spetsnaz ve diger mahsus hızmetlerniñ hadimleri — umumen onğa yaqın adam basıp kirgen.
Operativ areketlerine "E" Merkeziniñ bölük reberi Ruslan Şambazov yolbaşçılıq etken. Qırımdaki sabıq ukrayin milisiniñ hadimi 2014 senesi Rusiyege ant etkeni ve Qırımlılarnıñ taqip etilmesinde iştirak etkeninnen bellidir.
Asılında bu tintüv ediNazim Şeyhmambetov
Silâlı quvetler "operativ-qıdıruv tedbiriniñ" keçirilmesi aqqında vesiqalarnı taqdim etti.
"Asılında bu tintüv edi. Qanunğa zıt kelgen vesiqa ve eşyalarnı, cinaiy faaliyetni tasdıqlağan vesiqalarnı qıdıra ediler. Biz, ofisimizde advokat sırı olğan bir çoq vesiqa bar, dep itiraz ettik. Amma bu itirazlar körmemezlikke uruldı", — dep tarif etti "Qırım birdemligi"ne Nazim Şeyhmambetov.
Nazim Şeyhmambetov
Operativ tedbirler devam etken dört saat devamında advokatlarnı ofislerinden çıqarmadılar. Ofiske öz zenaatdaşlarından soñra kelgenine Emil Kurbedinov ise quvetçiler asla kirsetmediler.
"Ekstremizmnen küreş merkeziniñ hadimi çıqıp, bu tedbirge keç qalğanımnı ayttı. Ve meni içeri almadılar. Bu odada advokat dosyelerim olsa da", — dep bildirdi "Qırım birdemligi"ne o.
Emil Kurbedinov
Onıñ aytqanına köre, operativciler bütün dolap ve cüzdanlarnı baqıp çıqqanlar, adliyecilerniñ vesiqalarını ve uquqiy yardım aqqında vesiqalarnı tutıp alğanlar. Advokatlar bunı qanun bozuluvı dep sayalar.
Qırımdaki Rusiye quvetçileriniñ resmiy saytlarında bu tintüv aqqında haber etilmey.
"Qanunlarğa riayet etilmesine çağırğanımız içün taqip eteler"
"Qırım birdemligi"niñ malümatına köre, advokatlar ofisiniñ "teftiş etilmesine" ruhset Qırımnıñ Rusiye İç işler nazirliginiñ Qırım yolbaşçısınıñ muavini Dmitriy Nesterovnıñ Qırım Yuqarı mahkemesine muracaatından soñ berilgen.
"Berilgen malümatqa köre, yuqarıda qayd etilgen şahıslar [advokatlar] iş ve diger faaliyet içün bina qullanalar. <...> [Anda] olarnıñ qanunsız faaliyetini tasdıqlağan kâğıt ve elektron malümat taşıyıcıları, ayrıca grajdan qullanuvından alınğan şeyler, mahsulat ve maddeler saqlana bile. <…> Qırım Cumhuriyeti İç işler nazirligi berilgen muracaatnıñ esaslı olğanını isbatlağan yeterli delillerni ketirdi", — dep yazıla vesiqada.
Rusiye quvetçileri "Qırım birdemligi"niñ toplaşuvında, arhiv
Bundan soñ Emil Kurbedinovğa reis muavini Viktor Sklâarovnıñ imzasınen Rusiye Federatsiyasınıñ Yuqarı mahkemesiniñ qararı taqdim ettildi. Vesiqada Emil Kürbedinov ve zenaatdaşları "qanunsız areketler yapqanları" aqqında aytıla. Bu areketler Rusiye Federatsiyası Ceza kodeksiniñ 205.5, 205.1, 199 maddelerinen bağlı — terroristik teşkilâtnıñ faaliyetini teşkil etüv, terrorizmge yardım etüv ve bergi tölememeknen bağlı.
Advokatlar buña olarnıñ alâqası olğanını red eteler. Olar bu zorbalıq aktsiyasını, zenaat faaliyetleri içün olarğa basqı usulı olaraq sayalar.
Bu daa bir qorqutuv areketi, bir şey tapmağa ıntıluv olğanı açıq-aydın körüneEmil Kurbedinov
"Bu daa bir qorqutuv areketi, bir şey tapmağa ıntıluv olğanı açıq-aydın körüne. Bizler cinayetçi olsa edik, ne qıdırğanlarını añlar edik. Amma bizge qarşı bir şey tapıp olamaylar, şunıñ içün elinden kelgen er şeyni uydurmağa mecburlar. Ve bundan soñ ufürtip, parmağından süzip çıqaralar. Advokatlarğa, aq qorçalayıcılarğa daa bir basqı, çünki biz, esasen, laf etemiz ve qanunğa riayet etmege çağıramız. Bizl, cinayetçilerniñ tam tersimiz. Amma bunıñ içün biz taqip etilecekmiz. Bu bir saçmalıqtır", — dedi Emil Kurbedinov.
Rusiye quvetçileri Qırımda
Qırımlı advokatlar ve aq qorçalayıcılar Rusiye quvetçileriniñ basqısına ilk sefer rastkelmey. Olarnı bir qaç kere tutıp aldılar, tinttiler, para cezasını berdiler, memuriy apiske aldılar, körüşüvlerini toqtattılar ve işlerine türlü yollarnen keder ettiler. Memuriy resursnıñ ğayretinen Qırımda dört advokat litsenziyasız qaldı. Olar bunı red etmege tırıştılar, amma neticesiz.
"Advokatlar, Rusiye sustırmağa tırışqan sestir"
Qırımtatar resurs merkezinde Qırımlı aq qorçalayıcılarğa qarşı zorbalıq areketlerini takbih ettiler.
Advokatlarğa yapılğan basqı qorçalav aqqına yapılğan doğrudan-doğru ücümdir
"Advokatlarğa yapılğan basqı qorçalav aqqına yapılğan doğrudan-doğru ücümdir ve işğal etilgen yarımadada uquqnıñ esas qaideleri çalışmağanına daa bir delildir. Bu taqipler muntazam ve siyasiy mabüslerni ihtisaslı uquqiy yardımdan ayırmaq ve uquq qoruyıcı toplulıqnı qorquzmaq içün yapıla", — dep bildirdi teşkilât.
Lilâ Gemeci
Rusiye akimiyeti tarafından taqip etilgen Qırımlı advokatlarnı Harkiv aq qorçalayıcı gruppası destekledi.
"Rusiye işğal etilgen Qırımda bütün mustaqil kütleviy haber vastalarını bastırğanından ve vatandaş jurnalistleri ve faallerni apiske alğanından sebep, siyasiy mabüslerni qorçalağan advokatlar sıq-sıq olarnıñ yekâne sesleri ola. Rusiye olarnı sustırmağa tırışa. Rusiye aq qoruyıcı areketini bastırmaq içün "terrorizm" qabaatlavlarını silâ olaraq qullana", — dep bildirdi teşkilât.
Rusiye quvetçileri Aqmescitte "Qırım birdemligi"niñ toplaşuvında, 2018 senesi
Qırım advokatlarına basqı yapılğanını Ukrayina prezidentiniñ Qırım Muhtar Cumhuriyetindeki temsilciligi de takbih etti.
"Temsilcilik ukrayin ve halqara müessiselerni, aq qorçalayıcı teşkilâtlarnı ve matbuat vastalarını Qırımda taqiplerniñ bütün adiselerini qayd etmege çağıra. Bu, uquq bozuluvlarına uquqiy qıymet kesüv, qabaatlılarnı mesüliyetke çeküv, Rusiyege qarşı halqara basqını quvetleştirüv ve yarımadada işğalci memuriyetniñ cinayetlerini aydınlatmaq içün müimdir", — dep aytıla müessiseniñ haberinde.
On ukrayin aq qorçalayıcı teşkilâtından ibaret koalisiya çetel devletlerniñ ükümetlerine ve halqara teşkilâtlarğa Qırım advokatlarınıñ evlerinde keçirilgen tintüvler sebebinden muracaat etti. Olar Qırımda advokat ve uquqçılarğa qarşı yapılğan repressiyalarnı ayıplamağa ve işğal etilgen Qırımda insan aqlarınıñ bozuluvı içün mesüliyetli olğanlarğa qarşı şahsiy sanksiyalar tayin etmege çağıralar.
Rusiye akimiyeti Qırımda siyasiy taqiplerni red ete.